वीरगंज (पर्सा), ३० असार । पर्सा क्षेत्र नं. १ का प्रतिनिधिसभा सदस्य हरि पन्तले पथलैया–वीरगंज औद्योगिक करिडोरका उद्योगबाट प्रशोधनबिनै रासायनिकयुक्त फोहोर पानी सिर्सिया नदीमा मिसाइँदा नदीको अस्तित्व नै संकटमा परेको भन्दै सरकारलाई तत्काल प्रभावकारी कदम चाल्न आग्रह गरेका छन् ।
मंगलबार प्रतिनिधिसभाको बैठकमा विशेष ध्यानाकर्षण गराउँदै सांसद पन्तले औद्योगिक प्रदूषणका कारण ऐतिहासिक सिर्सिया नदी अहिले दुर्गन्धित नालामा परिणत भएको बताए । उद्योगहरूले वातावरणीय मापदण्डको बेवास्ता गर्दै प्रशोधन नगरेको फोहोर पानी सिधै नदीमा बगाइरहेको आरोप लगाउँदै उनले यसले नदीको प्राकृतिक स्वरूप र पर्यावरण दुवैलाई गम्भीर क्षति पुर्याएको उल्लेख गरे ।
उनले सिर्सिया नदी केवल पानीको स्रोत मात्र नभई वीरगंजको धार्मिक, सांस्कृतिक र सामाजिक जीवनसँग गहिरो रूपमा जोडिएको नदी भएको स्मरण गराए । विगतमा लोकआस्थाको महान् पर्व छठका अवसरमा यही नदीमा उभिएर श्रद्धालुले अर्घ्य दिने परम्परा रहेको उल्लेख गर्दै अहिले भने नदीको पानी यति प्रदूषित र दुर्गन्धित बनेको छ कि छठका बेला समेत नदीमा प्रवेश गर्न सकिने अवस्था नरहेको बताए ।
सांसद पन्तका अनुसार सिर्सिया नदी अहिले लामखुट्टेको प्रमुख प्रजननस्थल बनेको छ । नदी किनार आसपास बसोबास गर्ने स्थानीयवासी दुर्गन्ध र लामखुट्टेको अत्यधिक प्रकोपका कारण रातको समयमा समेत सहज रूपमा बस्न नसक्ने अवस्था रहेको उनले बताए । उनले सिर्सिया नदीको प्रदूषण नयाँ समस्या नभए पनि वर्षौंदेखि समाधानविहीन बनेको भन्दै संघीय, प्रदेश र स्थानीय तहका सरकारले चुनावी घोषणापत्रमा मात्रै नदी संरक्षणको विषय उठाउने तर कार्यान्वयनमा उदासीन रहने प्रवृत्तिको आलोचना गरे ।
सांसद पन्तले यसपटक राष्ट्रिय स्वतन्त्र पार्टीप्रति विश्वास व्यक्त गरेका वीरगंजवासीले सिर्सिया नदीको सफाइ र पुनर्जीवनका लागि ठोस पहल हुने अपेक्षा गरेको उल्लेख गर्दै सम्माननीय सभामुखमार्फत सरकारसँग तत्काल दीर्घकालीन योजना ल्याई नदी संरक्षण र पुनर्जीवन अभियान सुरु गर्न माग गरे ।
उनले सिर्सिया नदीको संरक्षणलाई केवल वातावरणीय सरोकारका रूपमा सीमित गर्न नहुने धारणा राख्दै यो जनस्वास्थ्य, धार्मिक आस्था, वातावरणीय सन्तुलन तथा वीरगंजको समग्र जीवनसँग प्रत्यक्ष रूपमा जोडिएको संवेदनशील विषय भएकाले सरकारले उच्च प्राथमिकताका साथ प्रभावकारी हस्तक्षेप गर्नुपर्नेमा जोड दिए ।
प्रतिक्रिया दिनुहोस् !