वीरगंज (पर्सा), १७ असार । नेपाल आयल निगम लिमिटेडले पेट्रोलियम पदार्थको मूल्य घटाएलगत्तै वीरगंजका अधिकांश निजी पेट्रोल पम्पमा कृत्रिम अभाव देखिएपछि जिल्ला प्रशासन कार्यालय पर्सा र नेपाल प्रहरीको संयुक्त टोलीले छडके अनुगमण गरेको छ । निगमले मङ्गलबार रातिदेखि लागू हुने गरी पेट्रोलमा प्रतिलिटर २० रुपैयाँ तथा डिजेल र मट्टीतेलमा प्रतिलिटर ३० रुपैयाँ मूल्य घटाएको थियो ।
मूल्य घटेपछि वीरगंजका अधिकांश पेट्रोल पम्पले बुधवार विहानै देखि ‘पेट्रोल र डिजेल उपलब्ध छैन’ भन्ने सूचना राखेर बिक्री–वितरण बन्द गरेका थिए । प्रशासनको प्रारम्भिक निष्कर्षअनुसार केही पम्प सञ्चालकले मूल्य घट्नुअघि खरिद गरिएको इन्धन बढी मूल्यमा बिक्री गर्ने उद्देश्यले नयाँ मौज्दात नउठाई कृत्रिम अभाव सिर्जना गरेको देखिएको छ । वीरगंज, काठमण्डौ लगायत मुलुकका अधिकाँश स्थानमा पेट्रोल पम्पवलाहरूले यसै गरेको भन्दै कडा अनुगमन र कारवाही गर्न सरकारले जिल्ला प्रशासनलाई निर्देशन दिएको थियो ।
यस्तै भएको बुधवार मध्यान्ह देखि जिल्ला प्रशासन कार्यालय र प्रहरीको टोलीले विभिन्न पेट्रोल पम्पमा पुगेर मौज्दात, बिक्री–वितरण तथा आपूर्तिको अवस्थाबारे अनुगमन गरेको थियो । नेपाल आयल निगमले भने बजारमा इन्धनको वास्तविक अभाव नरहेको स्पष्ट गर्दै पर्याप्त मौज्दात रहेको जनाएको छ । सहज रूपमा इन्धन उपलब्ध हुँदाहुँदै पनि जानाजानी बिक्री बन्द गर्ने तथा कृत्रिम अभाव सिर्जना गर्ने पम्प सञ्चालकमाथि कानुनबमोजिम कारबाही गरिने निगमले जनाएको छ ।
नयाँ मूल्यअनुसार पेट्रोलको मूल्य प्रतिलिटर १९७ रुपैयाँ, डिजेल तथा मट्टीतेलको १९५ रुपैयाँ र आन्तरिक हवाई इन्धनको २२९ रुपैयाँ कायम गरिएको छ । खाना पकाउने एलपी ग्यासको मूल्य प्रतिसिलिन्डर दुई हजार ६० रुपैयाँ यथावत् रहेको निगमले जनाएको छ । मध्यपूर्वमा युद्धविरामको सहमतिपछि अन्तर्राष्ट्रिय बजारमा पेट्रोलियम पदार्थको मूल्य घटेकाले सोहीअनुसार निगमले स्वचालित मूल्य प्रणालीअनुसार मूल्य समायोजन गरेको हो ।
प्रतिक्रिया दिनुहोस् !