वीरगंज (पर्सा), १६ असार । पर्साको बिन्दबासिनी गाउँपालिका–४ अमरपट्टीस्थित नेपाल–भारत सीमा क्षेत्रमा सशस्त्र प्रहरीले गाँजा सहित एक जनालाई पक्राउ गरेको छ ।
सशस्त्र प्रहरी बल नम्बर १३ गण पर्साका अनुसार मंगलबार बिहान करिब २ बजे बीओपी प्रसौनीभाठ्ठा र बीओपी अमरपट्टीबाट खटिएको संयुक्त पैदल गस्ती टोलीले भारततर्फ जाँदै गरेका पर्साको बहुदरमाई नगरपालिका–८ रामनगरी निवासी ५८ वर्षीय मनोहर सहनीलाई शंकास्पद अवस्थामा नियन्त्रणमा लिएको थियो ।
उनले बोकेको प्लास्टिकको बोराको जाँच गर्दा दुई पोकामा राखिएको करिब ११ किलोग्राम गाँजा बरामद भएको सशस्त्र प्रहरीले जनाएको छ । बरामद गरिएको गाँजा तथा पक्राउ परेका सहनीलाई थप अनुसन्धान र आवश्यक कानुनी कारबाहीका लागि प्रहरी चौकी अमरपट्टीमा बुझाइएको सशस्त्र प्रहरी नायब उपरीक्षक तथा सूचना अधिकारी मोहनराज निरौलाले जानकारी दिएका छन् ।
प्रतिक्रिया दिनुहोस् !