वीरगंज (पर्सा), १० असार । मधेश विश्वविद्यालयलाई वास्तविक अर्थमा बहुविषयक प्रादेशिक विश्वविद्यालयका रूपमा विकास गर्न माग गर्दै विद्यार्थी, शिक्षा प्रेमी युवा तथा नागरिकहरूको तर्फबाट प्रभाकर साहले विश्वविद्यालय प्रशासनलाई ज्ञापनपत्र बुझाएका छन् । उपकुलपति प्रो. डा. दीपकबहादुर शाक्यलाई बुझाइएको ज्ञापनपत्रमा विश्वविद्यालयको शैक्षिक दायरा विस्तार गर्दै विज्ञान, इन्जिनियरिङ, सूचना प्रविधिलगायत प्राविधिक संकाय तत्काल सञ्चालन गर्न आग्रह गरिएको छ ।
२०७९ सालमा स्थापना भएको मधेश विश्वविद्यालय हालसम्म पूर्ण विकसित प्रादेशिक विश्वविद्यालयको रूपमा स्थापित हुन नसकेको ज्ञापनपत्रमा उल्लेख गरिएको छ । विश्वविद्यालयले व्यवस्थापन, सार्वजनिक प्रशासन र कानुनजस्ता सीमित कार्यक्रम मात्र सञ्चालन गरिरहेको तथा विज्ञान र प्रविधिमूलक विषयहरू पूर्ण रूपमा अनुपस्थित रहेको भन्दै यसले मधेशका विद्यार्थीहरूलाई आधुनिक तथा प्रतिस्पर्धी शिक्षाबाट वञ्चित गरिरहेको दाबी गरिएको छ ।
ज्ञापनपत्रमा उपकुलपति शाक्यको वीरगञ्ज पब्लिक कलेज (बीपीसी) सँगको प्रत्यक्ष संलग्नताले द्वन्द्वको हित (Conflict of Interest) को अवस्था सिर्जना गरेको आरोपसमेत लगाइएको छ । विश्वविद्यालयको शैक्षिक विस्तार र नीतिगत निर्णयहरूमा यसले प्रभाव पार्न सक्ने भन्दै विद्यार्थी पक्षले पारदर्शिता र जवाफदेहिताको माग गरेको छ । प्रभाकर साहले आजको विश्वव्यापी शैक्षिक परिवेशमा विश्वविद्यालयहरू बहुविषयक, अनुसन्धानमुखी र नवप्रवर्तनमा केन्द्रित हुनुपर्ने उल्लेख गर्दै मधेश विश्वविद्यालय अझै सीमित शैक्षिक संरचनामा अल्झिएको बताए । उनका अनुसार प्रदेशका हजारौं विद्यार्थी विज्ञान तथा प्रविधि अध्ययनका लागि घर छोड्न बाध्य भइरहेका छन् ।
ज्ञापनपत्रमार्फत आगामी शैक्षिक सत्रभित्र विज्ञान, इन्जिनियरिङ, सूचना प्रविधि तथा अन्य प्राविधिक संकाय सञ्चालनको स्पष्ट कार्ययोजना सार्वजनिक गर्न, द्वन्द्वको हितसम्बन्धी प्रश्न समाधान गर्न, शिक्षक नियुक्ति तथा स्रोत व्यवस्थापनमा पारदर्शिता कायम गर्न र पूर्वाधार विकासका लागि निश्चित समयसीमा घोषणा गर्न माग गरिएको छ । ज्ञापनपत्र बुझ्दै उपकुलपति प्रो. डा. शाक्यले विज्ञान तथा इन्जिनियरिङसम्बन्धी कार्यक्रम सञ्चालन गर्ने विश्वविद्यालयको स्पष्ट इच्छा रहेको बताए । तर आवश्यक जग्गा, पूर्वाधार र दक्ष जनशक्तिको अभावका कारण तत्काल ती कार्यक्रम सुरु गर्न चुनौती रहेको उनको भनाइ थियो ।
‘उच्च माग भएका र नेपालमा सीमित रूपमा उपलब्ध कोर्सहरू सञ्चालन गर्ने हाम्रो योजना छ । हामी फरक पहिचान बोकेको विश्वविद्यालय निर्माणको दिशामा अघि बढिरहेका छौं । विज्ञान तथा प्रविधिलाई विश्वविद्यालयको विकासबाट अलग राख्ने कुनै सोच छैन,’ उनले भने । यद्यपि ज्ञापनपत्रमा उठाइएको द्वन्द्वको हितसम्बन्धी प्रश्नमा भने उपकुलपतिले स्पष्ट प्रतिक्रिया दिएका छैनन् ।
हाल दक्षिण कोरियाको उनेस (UNIST) मा इन्टिग्रेटेड पीएचडी इन बायोटेक्नोलोजी अध्ययनरत प्रभाकर साह विगत दुई वर्षदेखि मधेशमा विज्ञान तथा प्रविधि शिक्षाको पहुँच विस्तारका लागि विभिन्न पहल गर्दै आएका छन् । आफ्नै प्रदेशमा अन्तर्राष्ट्रियस्तरको विज्ञान तथा प्राविधिक शिक्षा उपलब्ध गराउने उद्देश्यले आफूले अभियान चलाइरहेको उनले बताए । उनका अनुसार ‘म जस्तै विज्ञान र प्रविधि अध्ययन गर्न चाहने हजारौं विद्यार्थीले भविष्यमा आफ्नो घर–परिवार र समाज छोडेर बाहिर जानुपर्ने बाध्यता अन्त्य होस् भन्ने उद्देश्यले यो पहल अघि बढाइएको हो ।’ 
प्रतिक्रिया दिनुहोस् !