कलैया (बारा), १० असार । देवताल गाउँपालिकाले आगामी आर्थिक वर्ष २०८३/०८४ का लागि ३९ करोड ७० लाख ३१ हजार रुपैयाँ बराबरको बजेट सार्वजनिक गरेको छ । बुधबार आयोजित गाउँपालिकाको १६औँ गाउँसभामा अध्यक्ष उदय प्रसाद यादवले आगामी आर्थिक वर्षको नीति, कार्यक्रम र अनुमानित आय–व्यय विवरण प्रस्तुत गरेका थिए ।
प्रस्तुत बजेटमा सामाजिक विकास, पूर्वाधार निर्माण तथा आर्थिक विकासलाई प्राथमिकतामा राखिएको छ । गाउँपालिकाले आन्तरिक आय, संघीय तथा प्रदेश सरकारबाट प्राप्त हुने वित्तीय समानीकरण, सशर्त, समपूरक, विशेष अनुदान तथा राजस्व बाँडफाँटबाट प्राप्त हुने स्रोतलाई आधार मानेर बजेट तयार गरेको जनाएको छ । गाउँपालिकाको आन्तरिक आम्दानी ३ करोड ७० लाख रुपैयाँ रहने अनुमान गरिएको छ । संघीय सरकारबाट वित्तीय समानीकरण अनुदानतर्फ ९ करोड १९ लाख रुपैयाँ प्राप्त हुने अनुमान गरिएको छ भने प्रदेश सरकारबाट वित्तीय समानीकरण अनुदान ६९ लाख ७१ हजार रुपैयाँ रहनेछ ।
त्यस्तै संघीय सरकारबाट सशर्त अनुदानतर्फ १४ करोड ३८ लाख रुपैयाँ, समपूरक अनुदानतर्फ १ करोड ३७ लाख रुपैयाँ र विशेष अनुदानतर्फ १ करोड ८० लाख रुपैयाँ प्राप्त हुने प्रक्षेपण गरिएको छ । संघीय राजस्व बाँडफाँटबाट ८ करोड १५ लाख ७६ हजार रुपैयाँ प्राप्त हुने अनुमान गरिएको छ । प्रदेश सरकारबाट समपूरक अनुदान ४० लाख रुपैयाँ, विशेष अनुदान ३० लाख रुपैयाँ, सशर्त अनुदान २ करोड ५० लाख रुपैयाँ तथा राजस्व बाँडफाँटबाट ४४ लाख ८४ हजार रुपैयाँ प्राप्त हुने बजेटमा उल्लेख गरिएको छ ।
कुल बजेटमध्ये चालु खर्चतर्फ २३ करोड १३ लाख ६० हजार रुपैयाँ विनियोजन गरिएको छ भने पूँजीगत खर्चका लागि १६ करोड ५६ लाख ७१ हजार रुपैयाँ छुट्याइएको छ । क्षेत्रगत रूपमा सामाजिक विकासतर्फ सबैभन्दा बढी १४ करोड ८० लाख १५ हजार २३० रुपैयाँ विनियोजन गरिएको छ । पूर्वाधार विकासका लागि १० करोड २१ लाख ५० हजार रुपैयाँ छुट्याइएको छ भने आर्थिक विकासतर्फ २ करोड ७० लाख १३ हजार ६२० रुपैयाँ विनियोजन गरिएको छ ।
यसैगरी सुशासन तथा अन्तरसम्बन्धित क्षेत्रका लागि ५० लाख रुपैयाँ र कार्यालय सञ्चालन तथा प्रशासनिक खर्चका लागि ११ करोड २९ लाख ५१ हजार १५० रुपैयाँ व्यवस्था गरिएको छ । गाउँपालिकाले प्रस्तुत गरेको बजेटले शिक्षा, स्वास्थ्य, कृषि, पूर्वाधार तथा सामाजिक सुरक्षासम्बन्धी कार्यक्रमलाई प्राथमिकता दिँदै समग्र विकासलाई गति दिने लक्ष्य लिएको जनाएको छ ।
सार्वजनिक गरिएको बजेटमा कृषि, शिक्षा, स्वास्थ्य, खानेपानी, सडक, सिंचाइ, सामाजिक सुरक्षा तथा पूर्वाधार विकासलाई मुख्य प्राथमिकतामा राखिएको जनाइएको छ । गाउँपालिकाले कृषिको आधुनिकीकरण, सिंचाइ विस्तार, विद्यालयको शैक्षिक गुणस्तर अभिवृद्धि, स्वास्थ्य संस्थाको सुदृढीकरण, ग्रामीण सडक स्तरोन्नति तथा खानेपानी व्यवस्थापनका कार्यक्रमलाई विशेष प्राथमिकतासाथ अघि बढाउने जनाएको छ । साथै महिला, दलित, विपन्न तथा पिछडिएका समुदायको उत्थानका लागि लक्षित कार्यक्रमहरू पनि बजेटमा समावेश गरिएको छ ।
गाउँसभामा प्रमुख प्रशासकीय अधिकृत कृष्णनन्द रायको कार्यसम्पादनको विशेष प्रशंसा गरिएको थियो । गाउँपालिका अध्यक्षसहित विभिन्न जनप्रतिनिधिहरूले सीमित स्रोत–साधनका बाबजुद प्रशासनलाई व्यवस्थित, पारदर्शी र जनउत्तरदायी बनाउन रायले उल्लेखनीय योगदान पुर्याएको बताए । जनप्रतिनिधि र कर्मचारीबीच प्रभावकारी समन्वय कायम गर्दै विकास निर्माणका कार्यलाई गति दिन, आर्थिक अनुशासन कायम गर्न तथा सेवाग्राहीलाई छिटोछरितो सेवा उपलब्ध गराउन उनको भूमिका महत्वपूर्ण रहेको धारणा व्यक्त गरिएको थियो । 
प्रतिक्रिया दिनुहोस् !