गोलबजार (सिरहा), ८ असार । सिरहाको सीमावर्ती क्षेत्रमा ठुलो परिमाणको प्रतिबन्धित खैरो हेरोइन सहित दुई जना भारतीय तस्कर पक्राउ परेका छन् । लागूऔषध ओसारपसार भइरहेको विशेष सूचनाका आधारमा खटिएको संयुक्त प्रहरी टोली र तस्करहरूबीच झडप हुँदा प्रहरीले स्थिति नियन्त्रणमा लिन गोलीसमेत चलाउनुपरेको छ ।
जिल्ला प्रहरी कार्यालय सिरहा, इलाका प्रहरी कार्यालय महेशपुरपतार र लागूऔषध नियन्त्रण ब्यूरो शाखा कार्यालय गोलबजारको संयुक्त प्रहरी टोलीले सिरहा नगरपालिका–२१ लकडिगोठबाट ९२.३ ग्राम ब्राउनसुगर सहित उनीहरूलाई नियन्त्रणमा लिएको हो । प्रहरीका अनुसार चेकजाँचका क्रममा लागूऔषधसहित फेला परेपछि तस्करको समूहले पक्राउबाट बच्न अचानक प्रहरी टोलीमाथि ढुङ्गामुढा प्रहार गरेको थियो ।
प्रहरीलाई आक्रमण गर्दै उनीहरू सीमापारि भारततर्फ भाग्न खोजेपछि प्रतिरक्षा र तस्करलाई रोक्न प्रहरीले सुरुमा एक राउण्ड हवाई फायर गरेको थियो । त्यसपछि पनि आत्मसमर्पण नगरेपछि प्रहरीले चलाएको एक राउण्ड गोली लागेर एक तस्कर घाइते भएका छन् । गोली लागेर भारतको बिहार, मधुवनी जिल्ला पदमाहा ग्राम पञ्चायत–२ जोगिया टोल निवासी अन्दाजी २८ वर्षीय छोटु भनिने रञ्जित कुमार पासवान घाइते भएका हुन् । उनको खुट्टामा गोली लागेको छ ।
सोही झडप र ढुङ्गामुढाका क्रममा इलाका प्रहरी कार्यालय महेशपुरपतारमा कार्यरत प्रहरी जवान हृदय नारायण ठाकुर पनि घाइते भएका छन् । घाइते भएका तस्कर पासवान र प्रहरी जवान ठाकुर दुवै जनाको यतिबेला प्रादेशिक अस्पताल सिरहामा उपचार भइरहेको छ । प्रहरीले घटनास्थलबाट ढुङ्गामुढा प्रहार गरी भाग्न खोज्ने भारत, मधुवनीकै अन्दाजी १७ वर्षीय रमन कुमार पासवानलाई समेत नियन्त्रणमा लिएको छ । 
प्रतिक्रिया दिनुहोस् !