परवानीपुर (बारा), ८ असार । बारा जिल्लाको परवानीपुर गाउँपालिकाले आगामी आर्थिक वर्ष २०८३/०८४ का लागि ३६ करोड ६३ लाख १० हजार रुपैयाँको अनुमानित बजेट प्रस्तुत गरेको छ । सोमबार सम्पन्न गाउँपालिकाको १८औँ गाउँसभामा उपाध्यक्ष सुगान्धी देवी कनुइनले बजेट सार्वजनिक गर्दै विकास निर्माण, शिक्षा र सेवा प्रवाहलाई प्राथमिकतामा राखिएको जानकारी दिइन् ।
गाउँसभामा प्रमुख प्रशासकीय अधिकृत मुन्ना साह रौनियारले आगामी आर्थिक वर्षका लागि नीति तथा कार्यक्रम पेश गरेका थिए । प्रस्तुत नीति तथा कार्यक्रममा शिक्षा क्षेत्रको सुधार, पूर्वाधार विकास, सरसफाइ व्यवस्थापन, आर्थिक गतिविधिको प्रवद्र्धन तथा नागरिकलाई प्रभावकारी सेवा उपलब्ध गराउने विषयलाई विशेष प्राथमिकता दिइएको छ ।
गाउँपालिकाले अधुरा रहेका विद्यालय भवन निर्माण कार्य सम्पन्न गर्ने, करसम्बन्धी सेवा गाउँपालिकाबाटै उपलब्ध गराउने, भूमि प्रशासनसम्बन्धी सेवा स्थानीय तहबाट सञ्चालन गर्ने तथा वडा नम्बर १ मा नदी नियन्त्रणको काम सम्पन्न गर्ने योजना अघि सारेको छ । गाउँसभालाई सम्बोधन गर्दै गाउँपालिका अध्यक्ष रामक्षत्री प्रसाद कुर्मीले बजेट तथा कार्यक्रमको प्रभावकारी कार्यान्वयनका लागि जनप्रतिनिधि, कर्मचारी, राजनीतिक दल, नागरिक समाज र स्थानीय बासिन्दाबीच सहकार्य आवश्यक रहेको बताए । उनले सुशासन, विकास र नागरिकमैत्री सेवा प्रवाहलाई केन्द्रमा राखेर बजेट निर्माण गरिएको उल्लेख गरे ।
अध्यक्ष कुर्मीको अध्यक्षतामा सम्पन्न गाउँसभामा वडाध्यक्ष, कार्यपालिका सदस्य, वडा सदस्य, कर्मचारी तथा विभिन्न राजनीतिक दलका प्रतिनिधिहरूको सहभागिता रहेको थियो । 
प्रतिक्रिया दिनुहोस् !