वीरगंज (पर्सा), ६ असार । वीरगंजको मुख्य सडक क्षेत्रमा सरकारले सञ्चालन गरेको घर तथा संरचना हटाउने कारबाहीविरुद्ध प्रभावित स्थानीय बासिन्दाहरूले शनिबार साँझ सिटी जुलुस निकालेर शान्तिपूर्ण विरोध प्रदर्शन गरेका छन् । पुनर्वास, क्षतिपूर्ति तथा वैकल्पिक व्यवस्थाको माग गर्दै सडकमा उत्रिएका स्थानीयहरूले सरकारी कदमलाई अमानवीय र अव्यवस्थित भन्दै कडा असन्तुष्टि व्यक्त गरेका छन् ।
आदर्शनगर चोकबाट सुरु भएको जुलुसमा प्रभावित परिवारका सदस्यहरू, स्थानीय नागरिक तथा विभिन्न सामाजिक व्यक्तित्वहरूको उल्लेख्य सहभागिता रहेको थियो । सिटी बजाउँदै र विभिन्न नाराहरू लगाउँदै प्रदर्शनकारीहरू घण्टाघरतर्फ पुगेका थिए, जहाँ कोणसभामा परिणत भएको कार्यक्रममार्फत आफ्ना मागहरू सार्वजनिक गरिएको थियो ।
प्रदर्शनका क्रममा सहभागीहरूले ‘हाम्रो घर सुरक्षित गर’, ‘डोजर आतंक बन्द गर’, ‘सुकुम्बासी बनाउन पाइँदैन’, ‘जनतालाई उठीबास गराउन बन्द गर’, ‘हामीलाई न्याय चाहिन्छ’, ‘मेनरोडलाई सहरी सडक घोषणा गर’ तथा ‘ऐतिहासिक शहरको सम्मान गर’ जस्ता नारा लगाएका थिए । उनीहरूले विकासको नाममा नागरिकको आवास अधिकारमाथि हस्तक्षेप गरिएको आरोप लगाउँदै राज्यले संवेदनशील ढंगले समस्या समाधान गर्नुपर्ने माग गरेका छन् ।
स्थानीयवासीहरूका अनुसार सरकारी निकायले सञ्चालन गरेको संरचना हटाउने अभियानका क्रममा दर्जनौं परिवार प्रत्यक्ष प्रभावित भएका छन् । कतिपयको घर तथा व्यवसायिक संरचनामा क्षति पुगेको छ भने कतिपय परिवार विस्थापनको जोखिममा परेका छन् । प्रभावितहरू भन्छन्, कुनै स्पष्ट पुनर्वास योजना वा उचित क्षतिपूर्तिको व्यवस्था नगरी गरिएको कारबाहीले उनीहरूको दैनिक जीवन नै संकटमा परेको छ ।
प्रदर्शनकारीहरूले वीरगञ्ज केवल एउटा शहर मात्र नभई नेपालको आर्थिक केन्द्र तथा देशको प्रमुख प्रवेशद्वार भएको स्मरण गराउँदै यसको ऐतिहासिक, सांस्कृतिक तथा सामाजिक पहिचानलाई बेवास्ता गरेर सञ्चालन गरिएका गतिविधिहरूले शहरको मौलिक स्वरूप नै समाप्त पार्ने खतरा बढाएको बताएका छन् ।
कोणसभामा बोल्ने वक्ताहरूले विकास र सडक विस्तारको नाममा नागरिकलाई विस्थापित गर्ने कार्य स्वीकार्य नहुने चेतावनी दिएका थिए । उनीहरूले राज्यले जनताको भावना, सम्पत्तिको सुरक्षा र आवास अधिकारलाई सम्मान गर्दै वार्ता तथा सहमतिका आधारमा समाधान खोज्नुपर्ने धारणा राखेका थिए ।
प्रभावित बासिन्दाहरूले तत्काल उचित क्षतिपूर्ति, वैकल्पिक आवासको व्यवस्था, पुनर्वास योजना तथा संरचना हटाउने कार्यको पुनरावलोकन गर्न सरकारसँग माग गरेका छन् । उनीहरूले आफ्ना माग सम्बोधन नभए थप सशक्त आन्दोलनका कार्यक्रम घोषणा गर्न बाध्य हुने चेतावनी समेत दिएका छन् ।
वीरगंजमा पछिल्लो समय मेनरोड क्षेत्रमा भइरहेको संरचना हटाउने अभियानलाई लिएर जनस्तरमा चर्को बहस सुरु भएको छ । एकातर्फ सडक विस्तार र सहरी व्यवस्थापनको आवश्यकता औंल्याइँदै आएको छ भने अर्कोतर्फ प्रभावित नागरिकहरूको अधिकार, पुनर्वास र मानवीय पक्षलाई बेवास्ता गरिएको भन्दै विरोध बढ्दै गएको छ । यहीबीच शनिबारको सिटी जुलुसले प्रभावितहरूको असन्तुष्टि सडकमा पोखिएको संकेत गरेको छ । 
प्रतिक्रिया दिनुहोस् !