वीरगंज (पर्सा), ५ असार । पर्साको ठोरी गाउँपालिकामा रहेका पाँच विद्यालयको कक्षा १२ को नतिजाले अपेक्षाकृत कमजोर प्रदर्शन देखाएको छ । यस वर्ष परीक्षामा सहभागी कुल १४५ विद्यार्थीमध्ये ४५ जना मात्र उत्तीर्ण भएका छन्, जसअनुसार समग्र उत्तीर्ण प्रतिशत ३१.०३ रहेको छ ।
उत्तीर्ण प्रतिशतका आधारमा सरस्वती माध्यमिक विद्यालय गाउँपालिकाभित्र सबैभन्दा उत्कृष्ट विद्यालय बनेको छ । उक्त विद्यालयबाट परीक्षामा सहभागी ४२ विद्यार्थामध्ये २३ जना उत्तीर्ण भएका छन् । ५४.७६ प्रतिशत नतिजासहित सरस्वती माविले ठोरीका विद्यालयमध्ये पहिलो स्थान हासिल गरेको हो । दोस्रो स्थानमा रहेको ज्ञान वाटिका माध्यमिक विद्यालय, सुवर्णपुरबाट सहभागी १२ विद्यार्थामध्ये ४ जना उत्तीर्ण भएका छन् । विद्यालयको उत्तीर्ण प्रतिशत ३३.३३ रहेको छ ।
त्यसैगरी नेपाल राष्ट्रिय माध्यमिक विद्यालय, ओडारले २५ प्रतिशत नतिजासहित तेस्रो स्थान प्राप्त गरेको छ । उक्त विद्यालयबाट परीक्षामा सहभागी १६ जनामध्ये ४ जना उत्तीर्ण भएका हुन् । प्राविधिक माध्यमिक विद्यालय, दीपकनगरबाट ३९ विद्यार्थी सहभागी भएकोमा ८ जना उत्तीर्ण भएका छन् । २०.५१ प्रतिशत नतिजासहित विद्यालय चौथो स्थानमा रहेको छ ।
यस्तै माध्यमिक विद्यालय, विजयबस्तीबाट सहभागी ३६ विद्यार्थामध्ये ६ जना उत्तीर्ण भएका छन्। १६.६७ प्रतिशत उत्तीर्ण दरसहित उक्त विद्यालय पाँचौँ स्थानमा परेको छ । यसैबीच, ज्ञान वाटिका माध्यमिक विद्यालय सुवर्णपुरकी छात्रा जानकी कुमारी चौधरीले ३.६४ जीपीए हासिल गर्दै ठोरी गाउँपालिकाभरिका विद्यालयमध्ये सर्वाधिक अंक प्राप्त गर्ने विद्यार्थीको रूपमा आफूलाई स्थापित गरेकी छन् । समग्र नतिजाले ठोरी गाउँपालिकाको माध्यमिक तहको शैक्षिक अवस्था सुधारका लागि थप प्रयास आवश्यक रहेको संकेत गरेको छ भने केही विद्यालयले तुलनात्मक रूपमा उत्साहजनक प्रदर्शन गरेका छन् । 
प्रतिक्रिया दिनुहोस् !