वीरगंज (पर्सा), ५ असार । वीरगंजस्थित बीएचसी मेडिकल कलेजको नर्सिङ संकायमा अध्ययनरत विद्यार्थीहरूले पोषणसम्बन्धी जनचेतना अभिवृद्धि गर्ने उद्देश्यले एकदिने पोषण प्रदर्शनी आयोजना गरेका छन् । वीरगंजको बहुअरीस्थित वीरगन्ज हेल्थ केयर हस्पिटल परिसरमा सम्पन्न प्रदर्शनीमा गर्भवती महिला, सुत्केरी आमा, नवजात शिशु तथा विभिन्न उमेर समूहका बालबालिकाका लागि आवश्यक पोषणयुक्त आहारबारे जानकारीमूलक सामग्री प्रदर्शन गरिएको थियो ।
प्रविणता प्रमाणपत्र तह (पीसीएल) नर्सिङ दोस्रो वर्षमा अध्ययनरत ४० जना विद्यार्थीहरूले अस्पतालमा उपचार तथा सेवा लिन आएका बिरामी, कुरुवा र अन्य सेवाग्राहीलाई पोषणयुक्त भोजनको महत्व, तयारी गर्ने विधि तथा सही रूपमा सेवन गराउने तरिकाबारे प्रत्यक्ष जानकारी दिएका थिए ।
प्रदर्शनीमा गर्भावस्थामा आवश्यक पोषक तत्वयुक्त खानपान, शिशु जन्मिएपछि स्तनपानको महत्व, बोतलबाट दूध खुवाउँदा अपनाउनुपर्ने सावधानी, पूरक आहारको सुरुवात र उपयुक्त खाद्य सामग्री छनोट, सर्वोत्तम पीठोको उपयोगिता तथा तयारी विधिलगायत विषय समेटिएका सामग्री राखिएका थिए ।
त्यसैगरी अन्नप्राशनको महत्व, शिशुलाई दिनुपर्ने पोषणयुक्त खानेकुराहरू, सही तरिकाले हात धुने विधि तथा विद्यालय जाने बालबालिकाका लागि पौष्टिक टिफिन बक्स तयार गर्ने उपायबारे पनि जानकारीमूलक प्रदर्शनी सामग्री प्रस्तुत गरिएको थियो ।
बीएचसी मेडिकल कलेजकी प्राचार्य उषा घिमिरेका अनुसार पोषणसम्बन्धी व्यवहारिक ज्ञान समुदायसम्म पुर्याउने उद्देश्यले कार्यक्रम आयोजना गरिएको हो । प्रदर्शनीमा कलेजका विद्यार्थी, शिक्षक, कर्मचारी तथा अस्पतालसँग सम्बन्धित विभिन्न व्यक्तिहरूको सहभागिता रहेको थियो । स्वास्थ्य र पोषणसम्बन्धी सचेतना अभिवृद्धि गर्ने उद्देश्यले आयोजित उक्त प्रदर्शनीले सेवाग्राहीहरूलाई उपयोगी जानकारी प्रदान गरेको सहभागीहरूले बताएका छन् । 
प्रतिक्रिया दिनुहोस् !