वीरगंज (पर्सा), ३१ जेठ । जनता समाजवादी पार्टी (जसपा) नेपालका अध्यक्ष उपेन्द्र यादवले संघीयतालाई अझ सशक्त र प्रभावकारी बनाउन हालको ७ प्रदेशको संरचनालाई पुनरावलोकन गरी १० प्रदेश बनाउनु पर्ने बताएका छन् ।
वीरगंजस्थित होटल भिस्वामा आयोजित कार्यक्रममा बोल्दै अध्यक्ष यादवले मधेशका जनताले आफूहरूलाई संघीयताको रक्षाका लागि मतदान गरेको उल्लेख गर्दै जनताको विश्वास र अधिकारको रक्षा गर्न आफ्नो पार्टी प्रतिबद्ध रहेको बताए । उनले वर्तमान सरकारले भूमिहीन सुकुम्बासी तथा अव्यवस्थित बसोबासीहरूको समस्या समाधान गर्नुपर्नेमा जोड दिँदै उनीहरूलाई घरबारविहीन बनाउने कुनै पनि कदम स्वीकार्य नहुने स्पष्ट पारे ।
सरकारले सुकुम्बासीहरूको समस्या समाधानका लागि ठोस योजना ल्याउनुपर्ने उनको भनाइ थियो । अध्यक्ष यादवले सरकारले प्रस्तुत गरेको बजेटप्रति असन्तुष्टि व्यक्त गर्दै विद्युत्मा मूल्य अभिवृद्धि कर लगाउने निर्णय गलत भएको बताए । विद्युतमा लगाइएको कर तत्काल फिर्ता लिन सरकारसँग माग गर्दै उहाँले यसले आम उपभोक्ता तथा उद्योग व्यवसायलाई थप भार पर्ने धारणा राखे ।
यसैबीच अर्को प्रसङ्गमा बोल्दै अध्यक्ष यादवले नेपालले भारतसहित कुनै पनि देशको भूमि अतिक्रमण गरेको भन्ने दाबीको कुनै आधिकारिक आधार नभएको बताए । आफू दुईपटक परराष्ट्रमन्त्रीको जिम्मेवारी सम्हालिसकेको उल्लेख गर्दै अध्यक्ष यादवले नेपालले छिमेकी मुलुकको भूमि अतिक्रमण गरेको विषयमा अहिलेसम्म कुनै प्रमाण वा आधिकारिक जानकारी प्राप्त नभएको बताए ।
उनले भारतले समेत नेपालले आफ्नो भूमि मिचेको भनी औपचारिक रूपमा कुनै दाबी नगरेको अवस्थामा प्रधानमन्त्री बालेन शाहले नेपालले भूमि अतिक्रमण गरेको भन्ने अभिव्यक्ति दिनुभएकोप्रति आश्चर्य व्यक्त गरे । अध्यक्ष यादवले राष्ट्रिय हित र अन्तर्राष्ट्रिय सम्बन्धसँग जोडिएका संवेदनशील विषयमा अभिव्यक्ति दिँदा तथ्य र प्रमाणका आधारमा बोल्नुपर्ने बताए ।
उनले प्रधानमन्त्री शाहलाई आफ्नो दाबी पुष्टि गर्न आवश्यक प्रमाण सार्वजनिक गर्न चुनौतीसमेत दिए । उनले यस्ता विषयमा अनावश्यक भ्रम सिर्जना हुने खालका अभिव्यक्तिले देशको कूटनीतिक सम्बन्धमा असर पर्न सक्ने भएकाले जिम्मेवार ढङ्गले प्रस्तुत हुनुपर्ने धारणा व्यक्त गरे । 
प्रतिक्रिया दिनुहोस् !