वीरगंज (पर्सा), २६ जेठ । वीरगंज महानगरपालिका–१२ मुर्लीस्थित सगरमाथा एकेडेमी बोर्डिङ स्कुलले विद्यार्थीहरूमा नेतृत्व क्षमता अभिवृद्धि तथा लोकतान्त्रिक संस्कारको विकास गर्ने उद्देश्यले हेड ब्वाय, हेड गर्ल, हाउस क्याप्टेन र खेलकुद संयोजक चयनका लागि निर्वाचन कार्यक्रम सञ्चालन गरेको छ । विद्यालयस्तरमै लोकतान्त्रिक प्रक्रियाको अनुभव गराउने लक्ष्यसहित आयोजित निर्वाचनमा विभिन्न हाउसका विद्यार्थीहरूबीच नेतृत्वका लागि प्रतिस्पर्धा भएको विद्यालय प्रशासनले जनाएको छ ।
हरियो, पहेँलो, निलो र रातो हाउसका प्रतिनिधिहरूले विभिन्न पदका लागि उम्मेदवारी दिएका छन् । विद्यालयका प्रिन्सिपल जियालाल गुप्ताका अनुसार विद्यार्थीहरूमा जिम्मेवारीबोध, नेतृत्व विकास र लोकतान्त्रिक मूल्य–मान्यताप्रति सम्मानको भावना जागृत गराउन निर्वाचन प्रणाली अपनाइएको हो । उनले विद्यालयमै निर्वाचनको अभ्यास गराउँदा मतदान प्रक्रिया, मत सदर तथा बदर हुने अवस्था र लोकतान्त्रिक व्यवस्थाको महत्वबारे विद्यार्थीहरूले व्यवहारिक ज्ञान हासिल गर्ने अवसर प्राप्त गर्ने बताए ।
उनले भविष्यमा १८ वर्ष उमेर पुगेपछि हुने वास्तविक निर्वाचनमा विद्यार्थीहरू सचेत, जिम्मेवार र विवेकशील मतदाताका रूपमा सहभागी हुन सकून् भन्ने उद्देश्यले यस्ता कार्यक्रम प्रभावकारी साबित हुने विश्वास व्यक्त गरे । निर्वाचनबाट चयन हुने हेड ब्वाय, हेड गर्ल, हाउस क्याप्टेन तथा अन्य विद्यार्थी प्रतिनिधिहरूले विद्यालयमा अनुशासन कायम राख्ने, विद्यार्थीका समस्या समाधानमा सहकार्य गर्ने तथा नेतृत्वदायी भूमिका निर्वाह गर्ने जिम्मेवारी पाउनेछन् ।
उम्मेदवार विद्यार्थीहरूले आफूहरू निर्वाचित भए विद्यालय र विद्यार्थी समुदायको हितमा समर्पित भएर काम गर्ने तथा आफ्नो नेतृत्व क्षमता व्यवहारमा उतार्ने प्रतिबद्धता व्यक्त गरेका छन् । 
प्रतिक्रिया दिनुहोस् !