वीरगंज (पर्सा), २४ जेठ । पर्साको सखुवा प्रसौनी गाउँपालिका–२ श्रीपुर पञ्चगावामा आयोजित एकदिने निःशुल्क स्वास्थ्य शिविरबाट ४८२ जना बिरामी लाभान्वित भएका छन् । ग्रामीण क्षेत्रका नागरिकलाई विशेषज्ञ स्वास्थ्य सेवा सहज रूपमा उपलब्ध गराउने उद्देश्यले सञ्चालन गरिएको शिविरमा विभिन्न रोगसम्बन्धी परीक्षण, परामर्श तथा उपचार सेवा प्रदान गरिएको थियो ।
सखुवा प्रसौनी गाउँपालिकाको समन्वय, पर्सा ख्रिष्टियन समाज वीरगञ्जको आयोजन तथा नेशनल मेडिकल कलेज शिक्षण अस्पताल वीरगंजको प्राविधिक सहयोगमा श्री दीप नारायण आदर्श नमुना माध्यमिक विद्यालय परिसरमा शिविर सञ्चालन गरिएको हो । पर्सा ख्रिष्टियन समाजका कोषाध्यक्ष रामप्रसाद घिमिरेका अनुसार शिविरमा मुटुरोग, स्त्री तथा प्रसूति रोग र जनरल मेडिसिनसम्बन्धी विशेषज्ञ चिकित्सकहरूले सेवा दिएका थिए । सहभागी बिरामीहरूको निःशुल्क स्वास्थ्य परीक्षण, चिकित्सकीय परामर्श तथा आवश्यक औषधि वितरण गरिएको थियो ।
नेशनल मेडिकल कलेजका मार्केटिङ म्यानेजर जितेश चन्द्र दासले शिविरमा रक्तचाप, मधुमेह, नाडी परीक्षण, तौल मापन, इसिजी तथा ईकोसहितका आधुनिक स्वास्थ्य परीक्षण सेवासमेत उपलब्ध गराइएको जानकारी दिए । कार्यक्रमलाई सम्बोधन गर्दै गाउँपालिका अध्यक्ष जसवन्त यादवले ग्रामीण भेगका नागरिकलाई घर नजिकै विशेषज्ञ स्वास्थ्य सेवा उपलब्ध गराउने उद्देश्यले यस्ता कार्यक्रम आयोजना गरिएको बताए । आर्थिक अभाव वा पहुँचको समस्याका कारण अस्पतालसम्म पुग्न नसक्ने नागरिकका लागि स्वास्थ्य शिविर प्रभावकारी माध्यम बनेको उल्लेख गर्दै उनले आगामी दिनमा पनि यस्ता सहकार्यलाई निरन्तरता दिइने बताए ।
मुटुरोग विशेषज्ञ डा. अशरफ हुसेनले ग्रामीण क्षेत्रमा मुटुरोग तथा अन्य जटिल स्वास्थ्य समस्याबारे चेतनाको कमी रहेको उल्लेख गर्दै शिविरमार्फत धेरै बिरामीमा प्रारम्भिक अवस्थामै रोग पहिचान गर्न सहयोग पुगेको बताए । शिविरकै अवसरमा नेशनल मेडिकल कलेज शिक्षण अस्पताल र सखुवा प्रसौनी गाउँपालिकाबीच स्वास्थ्य सेवा सहकार्यसम्बन्धी समझदारीपत्र (एमओयू) मा हस्ताक्षर भएको छ । त्यस्तै नेशनल मेडिकल कलेज र पर्सा ख्रिष्टियन समाजबीच पनि स्वास्थ्य सेवामा सहकार्य गर्ने सम्बन्धमा छुट्टै सम्झौता गरिएको छ । सम्झौताअनुसार शिविरमा सहभागी बिरामीहरूले नेशनल मेडिकल कलेजमा थप उपचार गराउँदा २० प्रतिशतसम्म विशेष छुट सुविधा प्राप्त गर्नेछन् ।
पर्सा ख्रिष्टियन समाजका अध्यक्ष सिमोन राईको अध्यक्षतामा सम्पन्न कार्यक्रममा गाउँपालिका उपाध्यक्ष शर्मिला बिष्ट, स्वास्थ्य शाखा प्रमुख राजेश प्रसाद रौनियार, विद्यालयका प्रधानाध्यापक शिवनाथ प्रसाद चौधरी लगायतको उपस्थिति रहेको थियो । कार्यक्रमको सञ्चालन कोषाध्यक्ष रामप्रसाद घिमिरेले गरेका थिए । शिविरमा नेशनल मेडिकल कलेज शिक्षण अस्पतालका प्रमुख सूचना अधिकृत इ. प्रदीप कुमार चौधरी, क्वालिटी तथा अपरेशन म्यानेजर ब्रजकिशोर चौधरी, मार्केटिङ म्यानेजर जितेश चन्द्र दाससहित मुटुरोग विशेषज्ञ डा. अशरफ हुसेन, स्त्री तथा प्रसूति रोग विशेषज्ञ डा. रवि कुमार साह तथा जनरल फिजिसियन डा. प्रवेज आलम अन्सारीलगायतको चिकित्सक टोलीले सेवा प्रदान गरेको थियो । 
प्रतिक्रिया दिनुहोस् !