कोल्हभी (बारा), २३ जेठ । ‘घरदैलोमा डाक्टर’ अभियानअन्तर्गत प्रभु हस्पिटल, वीरगञ्जले बाराको कोल्भी नगरपालिका–८ नयाँबस्तीमा निःशुल्क स्वास्थ्य शिविर सञ्चालन गर्दै २०० जना स्थानीयवासीलाई विशेषज्ञ स्वास्थ्य सेवा प्रदान गरेको छ । ग्रामीण क्षेत्रमा स्वास्थ्य सेवाको पहुँच विस्तार गर्ने उद्देश्यले आयोजित शिविरमा वरिष्ठ हाडजोर्नी तथा नसा रोग विशेषज्ञ डा. शाश्वत साहले बिरामीहरूको स्वास्थ्य परीक्षण गर्नुका साथै नितम्ब तथा घुँडा जोर्नी प्रत्यारोपणसम्बन्धी आवश्यक परामर्श दिएका थिए । सहभागीहरूलाई निःशुल्क औषधि वितरण गरिनुका साथै सुगर परीक्षणसमेत गरिएको थियो ।
शिविरमा वीरगंज सामुदायिक आँखा अस्पतालको सहकार्य रहेको थियो । अस्पतालका आँखा विशेषज्ञ महेश सिंह धामीले निःशुल्क आँखा परीक्षण गरी आवश्यक औषधि वितरण गरेका थिए । परीक्षणका क्रममा मोतियाबिन्दु पहिचान भएका बिरामीहरूको शल्यक्रिया तत्काल गरिने जानकारी आयोजकले दिएको छ । स्वास्थ्य शिविरबाट ११० महिला र ९० पुरुष गरी कुल २०० जनाले सेवा लिएका छन् । लाभग्राहीमध्ये वृद्धवृद्धा, बालबालिका, अशक्त तथा आर्थिक रूपमा कमजोर नागरिकहरूको उल्लेखनीय सहभागिता रहेको थियो ।
कार्यक्रम प्रमुख दिलीप राज कार्कीले अस्पतालसम्म पुग्न कठिनाइ हुने नागरिकलाई आफ्नै समुदायमा गुणस्तरीय स्वास्थ्य सेवा उपलब्ध गराउने उद्देश्यले अभियान सञ्चालन गरिएको बताए । वडा अध्यक्ष अनुप सुवेदीले गाउँमै विशेषज्ञ चिकित्सकबाट स्वास्थ्य परीक्षण तथा निःशुल्क औषधि वितरण हुनुले स्थानीय बासिन्दालाई ठूलो राहत मिलेको उल्लेख गरे । वडा संयोजक विशाल ठकुरीले यस्ता समाजसेवामूलक स्वास्थ्य कार्यक्रमलाई निरन्तरता दिनुपर्ने आवश्यकता औँल्याउँदै स्वास्थ्य संस्था र स्वास्थ्यकर्मीहरूलाई ग्रामीण समुदायसँग अझ नजिक हुन आग्रह गरे ।
स्थानीयवासीको उत्साहजनक सहभागितासहित सम्पन्न शिविरले ग्रामीण क्षेत्रमा स्वास्थ्य सेवाको पहुँच विस्तार गर्न महत्वपूर्ण योगदान पुर्याएको आयोजकको भनाइ छ । 
प्रतिक्रिया दिनुहोस् !