वीरगंज (पर्सा), २० जेठ । करिब एक महिनादेखि सम्पर्कविहीन रहेका सशस्त्र प्रहरी बलका एक असई र एक युवती काभ्रेपलाञ्चोकको सामुदायिक वनभित्र रुखमा झुण्डिएको अवस्थामा मृत फेला परेका छन् । मृतकहरू पर्साको बहुदरमाई नगरपालिका–८ रामनगरी निवासी सशस्त्र प्रहरी बलका असई शक्ति राम र कैलालीको घोडाघोडी नगरपालिका–१ की २६ वर्षीया शर्मिला चौधरी रहेको प्रहरीले जनाएको छ ।
जिल्ला प्रहरी कार्यालय काभ्रेपलाञ्चोकका अनुसार पाँचखाल नगरपालिका–३ स्थित ठूली सामुदायिक वनमा बुधबार बिहान दुवै जनाको शव फेला परेको हो । वन समितिका सदस्यहरू खोटो संकलन तथा नियमित अनुगमनका क्रममा जंगल पुगेका बेला रुखमा झुण्डिएको शव देखेपछि प्रहरीलाई खबर गरेका थिए । घटनास्थलमा पुगेको प्रहरी टोलीले दुवै जना छुट्टाछुट्टै पासोमा झुण्डिएको र शव अत्यधिक सडिसकेको अवस्थामा भेटिएको जनाएको छ । लामो समय बितिसकेकाले शवका केही अंग छुट्टिएर भुइँमा खसेको अवस्था समेत देखिएको प्रहरीले बताएको छ ।
प्रहरीले घटनास्थलबाट बरामद भएका कपडा, कागजात तथा परिवारजन र आफन्तबाट प्राप्त जानकारीका आधारमा मृतकहरूको पहिचान पुष्टि गरेको जनाएको छ । शक्ति राम सशस्त्र प्रहरी बलको १५ नम्बर हेडक्वाटर पाँचखालमा कार्यरत थिए । उनी वैशाख १९ गते दुई दिनको बिदामा निस्किएका थिए । त्यसअघि वैशाख १८ गते शर्मिला चौधरी शक्ति रामलाई भेट्न काभ्रे जाने भन्दै घरबाट निस्किएकी थिइन् ।
दुवै जना लामो समयसम्म सम्पर्कमा नआएपछि परिवारले खोजी प्रक्रिया अघि बढाएका थिए । शक्ति रामका परिवारजनले वैशाख २१ गते सशस्त्र प्रहरी बलको १५ नम्बर हेडक्वाटरमा खोजतलासका लागि निवेदन दिएका थिए भने शर्मिलाका भाइ रञ्जित चौधरीले वैशाख २५ गते प्रहरी वृत्त बालाजुमा खोजीका लागि निवेदन दर्ता गरेका थिए । घटनाबारे विस्तृत अनुसन्धान जारी रहेको प्रहरीले जनाएको छ। दुवै शव पोस्टमार्टमका लागि धुलिखेल अस्पतालमा राखिएको छ । 
प्रतिक्रिया दिनुहोस् !