काठमाडौँ, १६ जेठ । नेकपा एमालेले आगामी प्रदेश तथा स्थानीय तह निर्वाचनलाई लक्षित गर्दै देशव्यापी ‘मिसन पार्टी जागरण’ अभियान सञ्चालन गर्ने घोषणा गरेको छ । पार्टीले संगठनलाई तल्लो तहसम्म थप सक्रिय बनाउँदै चुनावी तयारीलाई तीव्रता दिने उद्देश्यसहित अभियान अघि बढाएको जनाएको छ । शुक्रबार जारी गरिएको अपानि–२ मार्फत एमालेले अभियानको औपचारिक जानकारी सार्वजनिक गरेको हो ।
पार्टी सचिवालयको गत जेठ १० गते बसेको बैठकले केन्द्रीय नेताहरूको कार्यविभाजन टुंग्याएपछि सोही आधारमा अभियानलाई कार्यान्वयनमा लगिएको जनाइएको छ । अपानिमा पार्टी अध्यक्ष केपी शर्मा ओलीको राजनीतिक सन्देश, केन्द्रीय नेताहरूको जिम्मेवारी बाँडफाँट तथा स्थानीय तहसम्मको परिचालन योजनालाई समेटिएको छ । पार्टीले निर्वाचनको पूर्वतयारीलाई व्यवस्थित र प्रभावकारी बनाउन देशभर नेताहरूलाई विभिन्न जिम्मेवारीसहित खटाएको जनाएको छ ।
एमालेका प्रचार विभाग प्रमुख निरज आचार्यका अनुसार ‘मिसन पार्टी जागरण’ अभियानको मुख्य लक्ष्य संगठन विस्तार, जनसम्पर्क सुदृढीकरण र आगामी निर्वाचनका लागि कार्यकर्तालाई सक्रिय बनाउनु हो । उनले महानगरपालिका र उपमहानगरपालिकाका वडासम्म केन्द्रबाटै इन्चार्ज तोकिएको जानकारी दिए । अभियानमा केन्द्रीय सदस्य, केन्द्रीय सल्लाहकार परिषद्का सदस्य, विभिन्न केन्द्रीय आयोगका पदाधिकारी, प्रतिनिधिसभाका उम्मेदवार, प्रदेश तथा जिल्ला तहका वरिष्ठ नेताहरूलाई समेत परिचालन गरिएको छ ।
पार्टीले सबै तहका नेताहरूलाई जिम्मेवारी बाँडफाँट गर्दै संगठनात्मक गतिविधिलाई तीव्र बनाउने रणनीति अपनाएको जनाएको छ । एमालेले प्रदेश, जिल्ला, जनसंगठन तथा विभागगत संरचनामा समेत नेताहरूको जिम्मेवारी निर्धारण गरेको छ । यसमार्फत स्थानीय तहमा पार्टीको उपस्थितिलाई थप मजबुत बनाउने, जनतासँगको सम्बन्ध विस्तार गर्ने तथा निर्वाचन केन्द्रित गतिविधिलाई व्यवस्थित बनाउने लक्ष्य लिइएको छ । पार्टी नेतृत्वले अभियानलाई केवल संगठन विस्तारमा सीमित नराखी आगामी निर्वाचनका लागि जनमत निर्माण, कार्यकर्ता परिचालन तथा राजनीतिक सन्देशलाई जनस्तरसम्म पुर्याउने माध्यमका रूपमा समेत उपयोग गर्ने तयारी गरेको जनाएको छ । 
प्रतिक्रिया दिनुहोस् !