वीरगंज (पर्सा), ८ जेठ । वीरगंज महानगरपालिकाले आफ्नो क्षेत्रभित्र सञ्चालित संस्थागत (निजी) विद्यालय तथा मन्टेश्वरीहरूलाई गैरकानुनी र जथाभाबी शुल्क नअसुल्न कडा चेतावनी दिएको छ ।
केही निजी विद्यालयहरूले प्रचलित शिक्षा नियमावली विपरीत अनावश्यक शीर्षकमा शुल्क लिएको गुनासो आएपछि महानगरले यस्तो निर्देशन जारी गरेको हो । वीरगंज महानगरपालिकाअन्तर्गतको शैक्षिक प्रशासन महाशाखाका प्रमुख आनन्द लामिछानेले महानगरभित्रका सम्पूर्ण संस्थागत विद्यालयहरूलाई सम्बोधन गर्दै एक पत्र जारी गरेका छन् ।
उक्त पत्रमार्फत विद्यालयहरूले तोकिएको भन्दा फरक र गैरकानुनी ढङ्गले मापदण्ड विपरीतका शुल्कहरू लिइरहेको भन्दै त्यस्ता कार्य तत्काल रोक्न सूचित गरिएको छ । प्रमुख लामिछानेद्वारा जारी सूचनामा नियम विपरीतका कुनै पनि शुल्क नलिन विद्यालय प्रशासनको ध्यानाकर्षण गराइएको छ ।
महानगरले अब विद्यालयहरूमा कडाइका साथ अनुगमन गर्ने तयारीसमेत गरेको छ । अनुगमनका क्रममा कुनै पनि विद्यालयले नियम विपरीत तथा अनावश्यक शीर्षकमा शुल्क लिएको पाइएमा प्रचलित कानुनबमोजिम हदैसम्मको कारबाही गरिने चेतावनी महानगरपालिकाले दिएको छ । 
प्रतिक्रिया दिनुहोस् !