वीरगंज (पर्सा), १ जेठ । वीरगंज भन्सार कार्यालय पछाडिको इनर्वा गाउँ नाका हुँदै सिमावर्ती भारतीय शहर रक्सौल बाट खसी–बोकाको अवैध तस्करी खुलेआम भइरहेको तथ्य सार्वजनिक भएको छ । स्थानीय तथा प्रत्यक्षदर्शीका अनुसार उक्त क्षेत्रमा सशस्त्र प्रहरी बलको निगरानीबीचै मिलेमतोमा तस्करी भइरहेको आशंका गरिएको छ ।
स्थानीयवासीहरूले दिएको जानकारीअनुसार पछिल्ला दिनहरूमा दिनदहाडै तस्कर समूहले बालबालिकालाई समेत प्रयोग गरी खसी–बोका नेपालतर्फ ल्याउने कार्य गर्दै आएको देखिएको छ । भारततर्फ खसी–बोकाको मूल्य तुलनात्मक रूपमा सस्तो हुने भएकाले तस्करहरूले त्यसको फाइदा उठाउँदै अवैध कारोबार बढाएको आरोप स्थानीयको छ ।
सीमा क्षेत्रमा खटिएका सुरक्षाकर्मीहरूको प्रत्यक्ष उपस्थितिकै बीच तस्करी भइरहेको भए पनि नियन्त्रण नहुँदा उनीहरूले गम्भीर प्रश्न उठाएका छन् । कतिपयले तस्कर समूहसँग मासिक रकम बुझाउने सहमति भएको हुनसक्ने आशंका समेत व्यक्त गरेका छन् ।
स्थानीयका अनुसार सामान्य सर्वसाधारणले सय रुपैयाँभन्दा बढी मूल्यको सामान ल्याउँदा कडाइ हुने गरेको छ, तर संगठित समूहले भने खुलेआम खसी–बोका ओसारपसार गरिरहेको देखिनु दु:खद भएको उनीहरूको भनाइ छ ।
यस विषयमा प्रतिक्रिया दिँदै सशस्त्र प्रहरी बल नेपाल सीमा सुरक्षा गुल्म पर्साका सूचना अधिकारी प्रहरी नायब उपरीक्षक मोहन निरौलाले भने यस्तो गतिविधिबारे आफूहरूलाई आधिकारिक जानकारी नभएको बताएका छन् । उनले प्राप्त सूचनाका आधारमा अनुसन्धान अघि बढाइने र संलग्नता पुष्टि भएमा दोषीमाथि कडा कारबाही गरिने स्पष्ट पारेका छन् । 
प्रतिक्रिया दिनुहोस् !