वीरगंज (पर्सा), २८ वैशाख । उपभोक्ता हित संरक्षण मञ्चको उजुरीपछि पर्साको पकाहा मैनपुर गाउँपालिका–१ धोरेस्थित कलश मिल्क इन्डस्ट्रिज प्रा.लि. मा अनुगमन टोलीले छापा मारेको छ । दुग्ध तथा दुग्धजन्य पदार्थ उत्पादन गर्दै आएको उक्त उद्योगमा तोकिएको स्वच्छता तथा गुणस्तर मापदण्ड उल्लंघन भएको पाइएको अनुगमन टोलीले जनाएको छ ।
टोलीका अनुसार उद्योगले ‘दुग्ध तथा दूध पदार्थ उत्पादनको स्वच्छता एवं गुणस्तर निर्देशिका–२०७५” अनुसार आवश्यक मापदण्ड पूरा नगरेको पाइएको हो । उद्योगमा दूध, आइसक्रिम, घ्यू, खोवा तथा पनिर उत्पादन हुँदै आएको छ । अनुगमनका क्रममा उद्योग परिसरमा सरसफाइको कमी, उत्पादनमा प्रयोग हुने उपकरण जिर्ण अवस्थामा रहेको तथा आवश्यक कागजात अद्यावधिक नभएको फेला परेको जनाइएको छ ।
उद्योगको अवस्थाले उपभोक्ताको स्वास्थ्यमा जोखिम बढाउन सक्ने भन्दै अनुगमन टोलीले तत्काल सुधार गर्न निर्देशन दिएको छ । टोलीले उद्योगलाई लिखित निर्देशन जारी गर्दै २४ घण्टाभित्र आवश्यक कागजातसहित सम्बन्धित कार्यालयमा उपस्थित हुनसमेत आदेश दिएको छ । तोकिएको समयभित्र स्पष्टीकरण नदिए खाद्य ऐनअनुसार थप कारबाही गरिने चेतावनीसमेत दिइएको छ ।
अनुगमनमा सहभागी अधिकारीहरूले उपभोक्ताको स्वास्थ्यसँग प्रत्यक्ष जोडिएका उद्योगहरूमा गुणस्तर मापदण्डको कडाइका साथ पालना आवश्यक रहेको बताएका छन् । आगामी दिनमा यस्ता उद्योगमा नियमित तथा कडा अनुगमनलाई निरन्तरता दिइने उनीहरूको भनाइ छ । अनुगमन टोलीमा वाणिज्य, आपूर्ति तथा उपभोक्ता संरक्षण कार्यालय वीरगंज, खाद्य प्रविधि तथा गुण नियन्त्रण कार्यालय, जिल्ला प्रशासन कार्यालय, उपभोक्ता हित संरक्षण मञ्चका प्रतिनिधि, स्थानीय जनप्रतिनिधि तथा सञ्चारकर्मीहरूको सहभागिता रहेको थियो । 
प्रतिक्रिया दिनुहोस् !