वीरगंज (पर्सा), २८ वैशाख । गौतम माध्यमिक विद्यालय मा अध्ययनरत दुई छात्रामाथि भएको व्यवहारलाई लिएर उत्पन्न विवाद अन्ततः आपसी सहमति र मेलमिलापमार्फत समाधान गरिएको छ । विद्यालय प्रशासन र अभिभावक पक्षबीच भएको सहमति–पत्रमार्फत दुवै पक्षले विवाद अन्त्य गर्दै सुमधुर सम्बन्ध कायम राख्ने प्रतिबद्धता जनाएका छन् ।
सहमति–पत्रअनुसार नयाँ शैक्षिक सत्र सुरु भइसकेको अवस्थामा गत वैशाख २१ गते विद्यालय परिसरमा विद्यार्थी भर्ना प्रवेश परीक्षा सञ्चालन भइरहेको थियो । त्यही समयमा बाहिर ग्रीनसिटी अभियान तथा वीरगंज महानगरपालिका को सहकार्यमा नाला सफाइ कार्यक्रम सञ्चालन भइरहेका कारण विद्यालय क्षेत्रमा अत्यधिक भीडभाड भएको उल्लेख गरिएको छ ।
सोही क्रममा कक्षा–१० मा अध्ययनरत छात्रा अंकिता गुप्ता र कक्षा–८ की छात्रा आराध्या गुप्ता प्रवेश कार्ड साथमा नल्याई विद्यालय पुगेपछि केही समय कक्षाबाहिर बस्नुपरेको विद्यालयले जनाएको छ । छात्राहरूसँग सहज संवाद गरी कक्षामा प्रवेश गराउनुपर्ने अवस्था रहे पनि परिस्थितिवश त्यसो हुन नसकेको र त्यसबाट विद्यार्थी तथा अभिभावकमा मानसिक पीडा पुगेकोप्रति विद्यालय प्रशासनले दुःख व्यक्त गरेको छ ।
विद्यालयले उक्त घटना नियतवश नभई परिस्थितिजन्य भएको स्पष्ट पार्दै भविष्यमा यस्ता कमजोरी दोहोरिन नदिने प्रतिबद्धता जनाएको छ । दुवै पक्षबीच समझदारी र मेलमिलापका आधारमा विवाद समाधान गरी सकारात्मक सम्बन्ध कायम राख्न सहमति भएको जनाइएको छ । सहमति–पत्रमा अभिभावक पक्षलाई प्रथम पक्ष र विद्यालयलाई दोस्रो पक्षका रूपमा उल्लेख गरिएको छ । सहमतिमा पिन्टु रानिमार, सन्तोष पटेल, ललित कर्ण र रमेश कुमार शर्मा साक्षी बसेका छन् भने सुरेश प्रसाद गुप्ता रहोबर रहेका छन् । 
प्रतिक्रिया दिनुहोस् !