वीरगंज (पर्सा), २५ वैशाख । सडक दुर्घटनाको बढ्दो जोखिमलाई न्यूनीकरण गर्ने उद्देश्यसहित समुदाय–प्रहरी साझेदारी कार्यक्रमअन्तर्गत वीरगंज महानगरपालिका-१३ पावरहाउसस्थित जीएचपी स्कुलमा ट्राफिक सचेतनामूलक कार्यक्रम सम्पन्न गरिएको छ । विद्यालय तहदेखि नै ट्राफिक अनुशासन र सडक सुरक्षाबारे व्यवहारिक ज्ञान दिनुपर्ने आवश्यकतालाई मध्यनजर गर्दै कार्यक्रम आयोजना गरिएको आयोजकले जनाएको छ ।
विद्यालयको सभाहलमा आयोजित कार्यक्रममा स्कुलका प्रिन्सिपल रविन्द्र कौरको सभापतित्व रहेको थियो भने प्रमुख अतिथिका रूपमा जिल्ला प्रहरी कार्यालय पर्साका प्रहरी नायब उपरीक्षक राजु कार्कीको उपस्थिति रहेको थियो । कार्यक्रममा पर्सा ट्राफिक प्रहरी कार्यालयका प्रमुख युवराज कटवालले विद्यार्थीहरूलाई ट्राफिक नियमको पालना, सडक सुरक्षाको महत्व तथा दुर्घटना न्यूनीकरणका उपायबारे विस्तृत जानकारी दिएका थिए ।
विशेषगरी किशोर उमेरका विद्यार्थीहरू दैनिक विद्यालय आउजाउका क्रममा सडक प्रयोगकर्ता हुने भएकाले उनीहरूलाई प्रारम्भिक अवस्थादेखि नै ट्राफिक सचेतना आवश्यक रहेको कार्यक्रममा जोड दिइएको थियो । कक्षा ८, ९ र १० मा अध्ययनरत विद्यार्थीहरूको सहभागिता रहेको उक्त कार्यक्रममा ट्राफिक संकेतको सही प्रयोग, जेब्राक्रसिङको महत्व, हेल्मेट तथा सिटबेल्टको अनिवार्यता, मापसे गरेर सवारी चलाउँदा निम्तिने दुर्घटनाको जोखिम लगायतका विषयमा अभिमुखीकरण गरिएको थियो ।
कार्यक्रम संयोजक युवा अभियन्ता दिलिप राज कार्कीले पछिल्लो समय बढ्दो सडक दुर्घटनालाई नियन्त्रण गर्न विद्यालयस्तरबाटै जनचेतना फैलाउन आवश्यक रहेको बताए । उनका अनुसार ट्राफिक नियमबारे जानकारीको अभाव र लापरबाहीकै कारण धेरै दुर्घटना हुने गरेका छन् । उनले यस्ता सचेतनामूलक कार्यक्रम पर्साका विभिन्न विद्यालयहरूमा निरन्तर सञ्चालन हुँदै आएको र आगामी दिनमा अझ व्यापक रूपमा विस्तार गरिने जानकारी दिए ।
त्यसैगरी विद्यालयका सञ्चालक जगजित सिंहले ट्राफिकसम्बन्धी व्यवहारिक शिक्षा आजको आवश्यकता भएको उल्लेख गर्दै यस्ता कार्यक्रमले विद्यार्थीहरूमा अनुशासन, जिम्मेवारीबोध र सडक सुरक्षाप्रति सकारात्मक सोच विकास हुने विश्वास व्यक्त गरे । कार्यक्रममा सहभागी विद्यार्थीहरूले पनि ट्राफिक नियमबारे महत्वपूर्ण जानकारी प्राप्त भएको प्रतिक्रिया दिएका थिए ।
आयोजकका अनुसार मुख्य सडक आसपास बसोबास गर्ने तथा दैनिक सडक आवतजावत गर्ने विद्यार्थीहरूलाई लक्षित गरी दुर्घटनाबाट जोगिने उपायबारे विशेष रूपमा सचेत गराइएको थियो । सामुदायिक सहकार्य, प्रहरीको सक्रियता र विद्यालयको सहभागितामार्फत सञ्चालन गरिएका यस्ता कार्यक्रमहरूले ट्राफिक दुर्घटना न्यूनीकरणमा दीर्घकालीन सकारात्मक प्रभाव पार्ने अपेक्षा गरिएको छ । 
प्रतिक्रिया दिनुहोस् !