वीरगंज (पर्सा), २४ वैशाख । जिल्ला प्रशासन कार्यालय पर्सामा राष्ट्रिय परिचयपत्र सम्बन्धी सेवा दुई दिनदेखि अवरुद्ध भएको छ । राष्ट्रिय परिचयपत्र तथा पञ्जीकरण विभागको राष्ट्रिय परिचयपत्र व्यवस्थापन सूचना प्रणाली (एनआईडीएमआईएस) को केन्द्रीय सर्भरमा आएको प्राविधिक समस्याका कारण सेवा प्रभावित भएको जिल्ला प्रशासन कार्यालय पर्साले जनाएको छ ।
जिल्ला प्रशासन कार्यालयले बिहीबार सार्वजनिक सूचना जारी गर्दै सर्भरमा समस्या देखिएकाले पर्सासहित देशभरका जिल्ला प्रशासन कार्यालयबाट प्रदान गरिने राष्ट्रिय परिचयपत्र सम्बन्धी सेवा अवरुद्ध भएको जनाएको हो । प्रमुख जिल्ला अधिकारी भोला दाहालका अनुसार सूचना प्रणालीमा आएको प्राविधिक खराबीको मर्मत कार्य जारी रहेकाले हालसम्म सेवा पुनः सञ्चालन हुन सकेको छैन । विभागबाट सर्भर मर्मत सम्पन्न भएको जानकारी प्राप्त भएलगत्तै सेवा पुनः सुचारु गरिने प्रशासनले जनाएको छ । 
प्रतिक्रिया दिनुहोस् !