कलैया (बारा), १६ वैशाख । यातायात व्यवस्था कार्यालय बाराले सवारी चालक अनुमति पत्र (स्मार्ट कार्ड लाइसेन्स) को मौज्दात तथा वितरण सम्बन्धमा सूचना जारी गरेको छ । कार्यालयका अनुसार अनलाइन प्रणालीमा ‘प्रिन्ट’ भइसकेको देखिए पनि सम्बन्धित स्मार्ट कार्डहरू हालसम्म भौतिक रूपमा कार्यालयमा प्राप्त नभएको जनाएको छ ।
प्रिन्ट भएको देखिएपछि सेवाग्राहीहरू कार्यालयमा धाउने क्रम बढेपछि स्पष्टिकरणस्वरूप सूचना जारी गरिएको हो । कार्यालयले विभागबाट कार्डहरू ढुवानी भई नआएसम्म हतारमा कार्यालय नआउन सेवाग्राहीलाई अनुरोध गरेको छ । आफ्नो लाइसेन्स कार्ड उपलब्ध भएको सुनिश्चित गरी मात्र सम्पर्क गर्न समेत आग्रह गरिएको छ ।
सेवाग्राहीको सुविधाका लागि कार्यालयले आफ्नो आधिकारिक फेसबुक पेज ‘यातायात व्यवस्था कार्यालय कलैया’ मार्फत नियमित रूपमा अद्यावधिक सूचना उपलब्ध गराइने जनाएको छ । उक्त पेजमा प्रकाशित नामावली वा विवरण हेरेर मात्र कार्यालयमा उपस्थित हुन सूचनामा उल्लेख गरिएको छ ।
प्रतिक्रिया दिनुहोस् !