वीरगंज (पर्सा), ११ वैशाख । पर्सामा सशस्त्र प्रहरीले भन्सार छली गरेर नेपाल भित्र्याउन लागिएका २२ थान इलेक्ट्रिक स्कुटर बरामद गरेको छ । सशस्त्र प्रहरी बल नेपाल नं. १३ गण, पर्साबाट खटिएको टोलीले बिहीबार जिल्लाका विभिन्न सीमावर्ती नाकामा निगरानीका क्रममा ती स्कुटरहरू नियन्त्रणमा लिएको हो ।
सशस्त्र प्रहरीका अनुसार वीरगञ्ज महानगरपालिका–१६ स्थित मुख्य भन्सार नाकाबाट १४ थान, वीरगञ्ज–२५ को सिर्सिया नाकाबाट ७ थान र बिन्दवासिनी गाउँपालिका–५ प्रसौनीभाठा नाकाबाट १ थान स्कुटर फेला पारिएको हो । अवैध रूपमा स्कुटर भित्र्याउने प्रयासमा संलग्न व्यक्तिहरू सुरक्षाकर्मीलाई देख्नासाथ फरार भएका छन् भने उनीहरूको खोजी तीव्र पारिएको छ ।
बरामद गरिएका स्कुटरहरूको अनुमानित मूल्य करिब १७ लाख ३० हजार रुपैयाँ रहेको जनाइएको छ । ती स्कुटरहरू आवश्यक कारबाहीका लागि वीरगञ्ज भन्सार कार्यालयमा बुझाइएको सशस्त्र प्रहरी बल नेपाल नं. १३ गण, पर्साका सूचना अधिकारी प्रहरी नायब उपरीक्षक मोहनराज निरौलाले जानकारी दिएका छन् ।
प्रतिक्रिया दिनुहोस् !