वीरगंज (पर्सा), ७ वैशाख । वीरगंज महानगरपालिका वडा नम्बर १२ स्थित मुर्ली चोकदेखि उत्तरतर्फ नेपाल आयल निगमको क्षेत्रीय कार्यालयसम्म जाने सडक विस्तार कार्य सुरु हुन नपाउँदै रोकिएको छ । सोमबार अपरान्हदेखि १० मिटर चौडा बनाउने तयारीसहित अघि बढाइएको योजना अदालतको आदेशपछि तत्कालका लागि स्थगित गरिएको हो ।
महानगरपालिकाले उक्त खण्डमा पर्ने सडकलाई मध्यभागबाट दायाँ–बायाँ ५/५ मिटर गरी विस्तार गर्ने तयारी गरेको थियो । यसका लागि आइतबार नै सूचना जारी गर्दै २४ घण्टाभित्र (सोमबार दिउँसो ३ बजेसम्म) संरचना हटाउन घरधनीहरूलाई आग्रह गरिएको थियो ।
तर सो क्षेत्रमा पर्ने तीन जना घरधनीले सडक विस्तार रोक्न माग गर्दै उच्च अदालत जनकपुर अस्थायी इजलाशमा रिट दायर गरेका थिए । सोही रिटमाथि प्रारम्भिक सुनुवाइ गर्दै अदालतले तत्काल सडक विस्तारको काम अघि नबढाउन आदेश (स्टे अर्डर) जारी गरेपछि योजना रोकिएको हो ।
वीरगंज महानगरपालिकाका मेयरका प्रेस सल्लाहकार नवराज फुयाँलका अनुसार अदालतको आदेशपछि हालका लागि विस्तार कार्य स्थगित गर्न बाध्य हुनुपरेको हो । उनका अनुसार आवश्यक कानुनी प्रक्रिया पूरा भएपछि मात्र पुनः काम अघि बढाइनेछ ।
महानगरपालिकाले यसअघि नै माघ १३ गते सार्वजनिक सूचना जारी गर्दै सो सडक विस्तार गर्ने जानकारी गराएको थियो। आयल निगम कार्यालयदेखि सबाह अन्सारीको घरसम्मको भाग विस्तार कार्य सम्पन्न भइसकेको र बाँकी खण्डमा पनि काम अघि बढाउने तयारी गरिएको थियो ।
तर पटक–पटक अवरोध हुँदै आएको उक्त योजना अदालतको अन्तरिम आदेशसँगै फेरि स्थगित भएको छ । मुर्ली चोकदेखि आयल निगमसम्मको यो सडकलाई व्यवस्थित र फराकिलो बनाउने योजना तत्कालका लागि अन्योलमा परेको छ ।
प्रतिक्रिया दिनुहोस् !