वीरगंज (पर्सा), ६ वैशाख । पर्साका ग्रामीण क्षेत्रमा चैते धान रोपाइँ गरिरहेका किसानहरू यतिबेला रासायनिक मलको अभावले गम्भीर संकटमा परेका छन् । रोपाइँ सम्पन्न भएको झण्डै दुई साता बितिसक्दा पनि डिएपी र यूरिया मल समयमै उपलब्ध नहुँदा खेती व्यवस्थापनमै समस्या उत्पन्न भएको हो । जिराभवानी गाउँपालिका–१, शान्तिनगरका किसान जलेश्वर दासका अनुसार नेपालमा मल नपाएपछि बाध्य भएर भारतीय बजारबाट डिएपी खरिद गर्नुपरेको छ, जहाँ ५० केजीको एक बोरा करिब ४ हजार रुपैयाँ पर्छ ।
त्यस्तै, अर्का किसान राउतले यूरिया मलसमेत प्रति केजी ४० रुपैयाँसम्म तिरेर ल्याउनुपरेको बताए । सामान्य अवस्थामा स्थानीय कृषि सहकारी संस्थामार्फत डिएपी करिब ५० रुपैयाँ र यूरिया २० रुपैयाँ प्रतिकेजीमा पाइने भए पनि हाल ती संस्थाहरूमा मल अभाव हुँदा किसानहरू महँगो मूल्यमा किन्न बाध्य भएका छन् । ‘संस्थामा मल छैन, त्यसैले बाहिरबाट महँगोमा ल्याउनुपरेको छ,’ किसानहरूको गुनासो छ ।
यसअघि मल अभाव हुँदा किसानहरूले सीमापार भारतीय बजारबाट सहजै मल ल्याएर आवश्यकता पूरा गर्ने गरेका थिए । तर हाल सरकारले १०० रुपैयाँभन्दा बढी मूल्यका सामग्री भित्र्याउँदा भन्सार अनिवार्य गर्ने नीति कडाइका साथ लागू गरेपछि त्यस्तो विकल्पसमेत सीमित बनेको छ, जसले समस्या झन् जटिल बनाएको किसानहरूको भनाइ छ ।
ठोरी, जिराभवानी, पटेर्वासुगौली, सखुवाप्रसौनी गाउँपालिका, पर्सागढी नगरपालिका तथा वीरगंजका केही वडामा चैते धान रोपाइँ सुरु भएको दुई साता नाघिसक्दा पनि मलको आपूर्ति सहज हुन सकेको छैन । रोपाइँका लागि अत्यावश्यक डिएपी, पोटास र यूरिया अधिकांश सहकारी संस्थामा अभावकै अवस्थामा छन् । गादी साना किसान कृषि सहकारी संस्था, रंगपुरका सञ्चालक हरिनारायण चौधरीले करिब २० दिनअघि कृषि सामग्री कम्पनी लिमिटेडबाट जम्मा ७५ बोरा यूरिया मात्र प्राप्त भएको जानकारी दिए । ‘डिएपी वा थप मल कहिले आउने हो भन्ने कुनै निश्चितता छैन,’ उनले भने ।
किसानहरूले सरकारको नीतिप्रति असन्तुष्टि व्यक्त गर्दै एकातिर उत्पादन वृद्धि गर्न दबाब दिने तर अर्कोतिर आवश्यक मल समयमै उपलब्ध नगराउने, सीमापारबाट ल्याउन कडाइ गर्ने तथा पेट्रोलियम पदार्थको मूल्य वृद्धि गर्ने जस्ता निर्णयले आफूहरू थप मारमा परेको बताएका छन् । उत्पादन भएको अन्नको उचित मूल्यसमेत नपाउँदा कृषि पेशा झन् कठिन बन्दै गएको उनीहरूको गुनासो छ । 
प्रतिक्रिया दिनुहोस् !