वीरगंज (पर्सा), ९ चैत । पर्साको पोखरिया नगरपालिकामा पछिल्ला दिनहरूमा संगठित रूपमा ठगीका गतिविधि बढ्दै गएको भन्दै चिन्ता व्यक्त गरिएको छ । विशेषगरी बेरोजगार युवाहरूलाई लक्षित गर्दै रोजगारीको प्रलोभन देखाएर रकम असुल्ने र काम लगाएर पनि पारिश्रमिक नदिने घटनाहरू वृद्धि भएको गुनासो आएको छ । यस विषयमा राष्ट्रिय मुक्ति पार्टीका सह–महासचिव नेजामुद्दिन समानीले सोमबार विज्ञप्ति जारी गर्दै नगरपालिकाभित्र विभिन्न शीर्षकमा आर्थिक अनियमितता र ठगी भइरहेको आरोप लगाएका छन् ।
उनका अनुसार कर वृद्धि गर्ने बहानामा अनावश्यक शुल्क उठाइएको छ भने ३०० रुपैयाँ रहेको सम्पत्ति करलाई बढाएर १५०० रुपैयाँसम्म पुर्याइएको र विरोधपछि सामान्य रूपमा मात्र घटाइएको जानकारी प्राप्त भएको छ । त्यसैगरी नगर विस्तार र विकास योजनाका नाममा सर्वसाधारणबाट रकम उठाउने तथा भ्रम सिर्जना गर्ने गतिविधि पनि भइरहेको आरोप लगाइएको छ । डिटेल प्रोजेक्ट रिपोर्ट (डि.आर.पी.) तयार पार्ने प्रक्रियामा समेत आर्थिक अपारदर्शिता र अनियमितता भएको दाबी गरिएको छ ।
सम्बन्धित निकायलाई पटक–पटक ध्यानाकर्षण गराएपनि कुनै ठोस कदम नचालिएको भन्दै उनले असन्तुष्टि व्यक्त गरेका छन् । जनताको सेवामा समर्पित हुनुपर्ने निकायबाटै आर्थिक शोषण भइरहेको भन्दै स्थानीयस्तरमा असन्तोष बढ्दै गएको उनको भनाइ छ । विज्ञप्तिमार्फत तत्काल निष्पक्ष छानबिन गर्न, दोषीलाई कडा कानुनी कारबाही गर्न, पीडितलाई उचित क्षतिपूर्ति दिन तथा कर प्रणालीलाई पारदर्शी र जनमैत्री बनाउन माग गरिएको छ । साथै, यस्ता गतिविधि दोहोरिन नदिन प्रभावकारी अनुगमन र नियन्त्रण व्यवस्था लागू गर्नुपर्नेमा जोड दिइएको छ ।
अन्त्यमा उनले नागरिकलाई आफ्ना अधिकारका लागि सचेत र एकजुट हुन, अन्याय र भ्रष्टाचारविरुद्ध आवाज उठाउन तथा सत्य र न्यायको पक्षमा उभिन आग्रह गरेका छन् ।
प्रतिक्रिया दिनुहोस् !