वीरगंज (पर्सा), ७ चैत । वीरगंजमा वित्तीय साक्षरता अभिवृद्धि गर्ने उद्देश्यसहित ग्लोबल मनी विक २०२६ को अवसरमा जनचेतनामूलक कार्यक्रम आयोजना गरिएको छ । नेपाल राष्ट्र बैंक वीरगंज कार्यालयको पहलमा शनिबार घण्टाघर चौकमा सम्पन्न उक्त कार्यक्रममा सर्वसाधारणलाई वित्तीय सुरक्षासम्बन्धी महत्वपूर्ण जानकारी प्रदान गरिएको थियो ।
कार्यक्रममा पैसा ठगीका विभिन्न रूप, नक्कली नोट पहिचान गर्ने तरिका तथा पछिल्लो समय तीव्र रूपमा बढिरहेको डिजिटल ठगीका जोखिमबारे सहभागीहरूलाई सचेत गराइएको थियो । सो अवसरमा बोल्दै सुशील पौडेलले वर्तमान समयमा वित्तीय साक्षरता अत्यन्त आवश्यक विषय बनेको उल्लेख गर्दै सबै नागरिकलाई सचेत र सजग रहन आग्रह गरे । उनले डिजिटल भुक्तानी गर्दा अपनाउनुपर्ने सावधानी, नक्कली नोट छुट्याउने उपाय तथा अनलाइन माध्यमबाट हुने ठगीबाट बच्ने तरिकाबारे विस्तृत जानकारी दिए ।
निर्देशक पौडेलका अनुसार पछिल्ला दिनहरूमा डिजिटल प्लेटफर्ममार्फत ठगीका घटनामा वृद्धि देखिएकाले अपरिचित लिंक, फोन वा सन्देशमा विश्वास नगर्न सर्वसाधारणलाई आग्रह गरिएको छ । साथै, बैंकिङ कारोबार गर्दा आफ्ना गोप्य विवरण कसैसँग पनि साझेदारी नगर्नुपर्नेमा विशेष जोड दिइएको थियो ।
कार्यक्रममा स्थानीय व्यवसायी, बैंकका कर्मचारी, सर्वसाधारण तथा विभिन्न संघसंस्थाका प्रतिनिधिहरूको उत्साहजनक उपस्थिति रहेको थियो । सहभागीहरूले यस्ता सचेतनामूलक कार्यक्रमले वित्तीय ज्ञान बढाउन ठोस सहयोग पुगेको धारणा व्यक्त गरेका थिए । नेपाल राष्ट्र बैंकले ग्लोबल मनी विकको अवसर पारेर देशभर नै यस्ता जनचेतनामूलक गतिविधि सञ्चालन गरिरहेको जनाएको छ ।
प्रतिक्रिया दिनुहोस् !