वीरगंज (पर्सा), १७ फागुन । पर्सा निर्वाचन क्षेत्र नम्बर–१ मा चुनावी माहोल तातेका बेला विभिन्न राजनीतिक दल परित्याग गरी सयौं नेता तथा कार्यकर्ता जनता समाजवादी पार्टी (जसपा) मा प्रवेश गरेका छन् । नवप्रवेशीहरूले प्रतिनिधिसभा निर्वाचनमा पर्सा–१ का उम्मेदवार रामनरेश यादवलाई विजयी गराउन एकजुट भएर लाग्ने प्रतिबद्धता व्यक्त गरेका छन् ।
कार्यक्रममा राष्ट्रिय प्रजातन्त्र पार्टी (राप्रपा) बाट मेयरका प्रत्याशी रहेका शिव पटेलसहित विभिन्न दलका नेताकार्यकर्ता जसपामा समाहित भएका हुन् । पार्टी प्रवेश गर्नेहरूमा शिव पटेल, सन्तोष पासवान, इस्लाम मियाँ, हरेराम पटेल, जंगबहादुर पासवान, नथु राउत, जलिल मियाँ, मुख्तार देवान, उमेश पटेल, आसिक अन्सारी, साम सिंह, सुरेन्द्र राम, धन सुनार साह र सोनालाल मण्डललगायत सयौं नेता तथा युवाहरू रहेका छन् ।
नवप्रवेशीहरूलाई मधेश प्रदेशका पूर्व मुख्यमन्त्री लालबाबु राउत गद्दी तथा उम्मेदवार यादवले टीका र गम्छा लगाएर स्वागत तथा सम्मान गरेका थिए । कार्यक्रममा बोल्दै नेताहरूले मधेशी समुदायको अधिकार, सामाजिक न्याय र समावेशी विकासका मुद्दालाई सशक्त रूपमा उठाउन जसपा नै उपयुक्त राजनीतिक शक्ति भएको दाबी गरे ।
उम्मेदवार यादवले पार्टी प्रवेश गर्ने सम्पूर्ण नेताकार्यकर्तालाई धन्यवाद दिँदै जनताको विश्वास जित्न अझ सशक्त र संगठित रूपमा अघि बढ्ने प्रतिबद्धता जनाए । उनले निर्वाचनपछि पर्सा–१ को समग्र विकास, रोजगारी सिर्जना, सुशासन प्रवद्र्धन तथा आधारभूत पूर्वाधार विस्तारलाई प्राथमिकतामा राख्ने स्पष्ट पारे ।
चुनावी सरगर्मी बढ्दै जाँदा विभिन्न दलबाट जसपामा भइरहेको प्रवेशले पर्सा–१ को राजनीतिक समीकरणमा नयाँ तरंग ल्याएको विश्लेषण गरिएको छ । स्थानीय तहदेखि प्रदेश र संघीय चुनावसम्म प्रभाव पार्न सक्ने यो प्रवेश अभियानले आगामी निर्वाचन परिणाममा महत्वपूर्ण भूमिका खेल्ने आँकलन गरिएको छ ।
प्रतिक्रिया दिनुहोस् !