मलङ्गवा (सर्लाही), ७ फागुन । मलंगवामा गोली चल्दा एक किशोर घाइते भएका छन् । सर्लाहीको सदरमुकामस्थित मलंगवा नगरपालिका–४ ढाँका बोडर क्षेत्रमा निर्माणाधीन मन्दिरभित्र फेला परेको पेस्तोल पड्किँदा स्थानीय एक बालकको हातमा चोट लागेको हो । जिल्ला प्रहरी कार्यालय सर्लाहीका अनुसार बिहीबार दिउँसो करिब १ः३५ बजे उक्त घटना भएको हो ।
प्रहरीका अनुसार स्थानीय बासिन्दा रामविश्वास रायका करिब १५ वर्षीय छोरा आकाश राय घरदेखि करिब १०० मिटर पूर्वतर्फ रहेको निर्माणाधीन हनुमान मन्दिर परिसरमा पुगेका थिए । मन्दिरभित्र रातो कपडाले बेरिएको अवस्थामा रहेको शंकास्पद वस्तु देखेपछि उनले उत्सुकतावश खोलेर हेर्दा त्यसमा पेस्तोल फेला परेको बताइएको छ ।
प्रारम्भिक अनुसन्धानअनुसार उक्त हतियार नक्कली हो भन्ने ठानी आकाशले चलाउने प्रयास गरेका थिए । तर, अचानक पेस्तोल पड्किँदा उनको दाहिने हातको पञ्जामा गोली लागेर उनी घाइते भएका हुन् । गोली लागेपछि उनी चिच्याउँदै बाहिर निस्किएपछि स्थानीयले प्रहरीलाई खबर गरेका थिए । सूचना प्राप्त हुनासाथ जिल्ला प्रहरी कार्यालय सर्लाहीबाट प्रहरी नायब उपरीक्षक सरोज राईको नेतृत्वमा टोली तत्काल घटनास्थलतर्फ खटिएको थियो ।
प्रहरीले घटनास्थलको घेराबन्दी गर्दै आवश्यक अनुसन्धान सुरु गरेको जनाएको छ । घाइते आकाशलाई तत्काल उद्धार गरी प्रादेशिक अस्पताल मलंगवामा उपचारका लागि पुर्याइएको छ । अस्पताल स्रोतका अनुसार उनको स्वास्थ्य अवस्था मध्यम रहेको छ र चिकित्सकको निगरानीमा उपचार भइरहेको छ ।
प्रहरीले घटनास्थलबाट एक थान पेस्तोल बरामद गरेको छ । साथै, पड्किएको खोका पेस्तोलमै अड्किएको अवस्थामा फेला परेको प्रहरीले जानकारी दिएको छ । घटनास्थल अस्थायी प्रहरी पोस्ट पेट्रोलपम्पबाट करिब एक किलोमिटर पूर्व तथा जिल्ला प्रहरी कार्यालयबाट करिब तीन किलोमिटर उत्तरतर्फ पर्ने बताइएको छ ।
यस घटनाले स्थानीय बासिन्दामा त्रास फैलिएको छ । निर्माणाधीन धार्मिक स्थलभित्र यसरी हतियार फेला पर्नुले सुरक्षा व्यवस्थामाथि प्रश्न उठाएको छ । पेस्तोल त्यहाँ कसरी र किन राखिएको थियो भन्ने विषयमा प्रहरीले थप अनुसन्धान गरिरहेको जनाएको छ । बालबालिकाले अपरिचित वस्तु नछुने तथा शंकास्पद सामग्री देखेमा तुरुन्त प्रहरीलाई जानकारी गराउनुपर्ने प्रहरीको जोड छ । घटनाबारे विस्तृत अनुसन्धान जारी रहेको जिल्ला प्रहरी कार्यालय सर्लाहीले जनाएको छ । 
प्रतिक्रिया दिनुहोस् !