वीरगंज (पर्सा), ३ फागुन । पर्सा जिल्लामा जेन–जेड अभियानलाई थप सशक्त बनाउने उद्देश्यले जगरनाथपुर गाउँपालिकामा विशेष बैठक सम्पन्न भएको छ । युवाहरूको सक्रिय सहभागितामा सम्पन्न उक्त बैठकले जगरनाथपुर क्षेत्रमा संगठन विस्तार गर्ने र नयाँ कमिटी गठन गर्ने निर्णय गरेको छ ।
बैठकको सहमतिअनुसार अमर किशोर ठाकुर लोहारको अध्यक्षतामा २१ सदस्यीय जेन–जेड कमिटी गठन गरिएको हो । नवगठित समितिले स्थानीय युवाहरूलाई संगठित गर्दै अभियानलाई गाउँपालिका स्तरमा प्रभावकारी बनाउने लक्ष्य राखेको जनाएको छ । भेलाले युवाशक्ति एकताबद्ध गरेर सामाजिक तथा समसामयिक मुद्दामा सक्रिय भूमिका खेल्ने प्रतिबद्धता पनि व्यक्त गरेको छ ।
समितिमा हरि ओम, मिथुन प्रसाद पटेल लगायतका युवाहरूलाई सदस्यका रूपमा समेटिएको छ । नेतृत्व चयनसँगै संगठनलाई व्यवस्थित र क्रियाशील बनाउने कार्ययोजना तयार गरिएको आयोजक पक्षले जनाएको छ । बैठकमा पर्सा जेन–जेडका सल्लाहकार अधिवक्ता अनिल शाह, कालिकामाई संयोजक रजनीश कुशवाहा, सुशील पटेल, मधुरञ्जन शाह लगायत युवाहरूको उल्लेखनीय उपस्थिति रहेको थियो ।
सहभागीहरूले जगरनाथपुरमा जेन–जेड अभियान विस्तार गर्दै युवाहरूलाई नेतृत्व र निर्णय प्रक्रियामा जोड्ने आवश्यकता औँल्याएका थिए । बैठकले आगामी दिनमा विभिन्न कार्यक्रम, अन्तरक्रिया तथा जनचेतनामूलक गतिविधि सञ्चालन गर्ने निर्णयसमेत गरेको छ । यस कदमसँगै जगरनाथपुरमा जेन–जेड अभियानले नयाँ ऊर्जा पाएको आयोजकहरूको विश्वास छ ।
प्रतिक्रिया दिनुहोस् !