वीरगंज (पर्सा), २८ माघ । पर्सा निर्वाचन क्षेत्र नं. ३ अन्तर्गत पकहाँ मैनपुर गाउँपालिका वडा नं. ३ मा नेकपा (एमाले) को वडा कमिटी कार्यालय औपचारिक रूपमा सञ्चालनमा आएको छ । एक विशेष कार्यक्रमका बीच प्रतिनिधिसभा सदस्यका उम्मेदवार रुपेश पाण्डेले कार्यालयको उद्घाटन गरेका हुन् ।
उद्घाटन समारोहमा बोल्दै पाण्डेले क्षेत्र नं. ३ को समग्र विकासका लागि सोच र शैलीमा परिवर्तन जरुरी रहेको बताए । आफूलाई नेताभन्दा पनि जनताको सेवकका रूपमा प्रस्तुत गर्दै उनले जनतालाई विश्वासको मत दिन आग्रह गरे । “म नेतृत्व गर्न होइन, सेवा गर्न आएको हुँ। एक अवसर दिनुहोस्, परिणामले आफैं बोल्नेछ,” उनले भने ।
उनले भाषणभन्दा कामलाई प्राथमिकता दिने प्रतिबद्धता दोहोर्याउँदै अवसर पाए क्षेत्रको स्वरूप परिवर्तन गर्ने दाबी गरे । देशको उन्नतिका लागि सुशासन अत्यावश्यक रहेको उल्लेख गर्दै शिक्षा, स्वास्थ्य, कृषि लगायतका आधारभूत क्षेत्रको सुधारमा विशेष ध्यान केन्द्रित गर्ने प्रतिवद्धता जनाए ।
कार्यक्रममा पकहाँ मैनपुर गाउँपालिकाका पूर्व अध्यक्ष विजय चौरसिया, नेता शिव पटेल, बिन्धान्चल ठाकुर, रामबाबु चौरसिया, तेजप्रकाश निषाद, राजकिशोर साह तेली, नवल पटेल, मोटर कुमार, जानमहमद आलम लगायत स्थानीय नेता तथा कार्यकर्ताको उपस्थिति रहेको थियो ।
प्रतिक्रिया दिनुहोस् !