वीरगंज (पर्सा), २५ माघ । पर्सा क्षेत्र नम्बर–१ बाट जनमत पार्टीका तर्फबाट प्रतिनिधिसभा सदस्यका उम्मेदवार ओमप्रकाश सरार्फले वीरगन्ज महानगरपालिका वडा नम्बर–७ कुम्हाल टोलमा व्यापक घरदैलो तथा स्थानीयसँग संवाद कार्यक्रम सम्पन्न गरेका छन् । त्यसैगरी वडा नम्बर–२१ ताजपुरमा युवाहरूसँग विशेष भेटघाट तथा छलफल कार्यक्रम आयोजना गरी उनले आफ्नो चुनावी अभियानलाई थप गतिशील बनाएका छन् । दुवै स्थानमा स्थानीय बासिन्दा तथा युवाहरूको उल्लेख्य सहभागिताले कार्यक्रम उत्साहपूर्ण बनेको थियो ।
घरदैलोका क्रममा उम्मेदवार सरार्फले स्थानीय जनतासँग प्रत्यक्ष संवाद गर्दै उनीहरूका समस्या, सुझाव र अपेक्षाहरू ध्यानपूर्वक सुने । उनले वीरगंजको समग्र विकास, जनजीवनसँग जोडिएका आधारभूत आवश्यकताहरू तथा युवापुस्ताको भविष्यबारे आफ्ना स्पष्ट योजना प्रस्तुत गरे । ताजपुरमा आयोजित युवा भेटघाटमा बोल्दै उनले पछिल्लो समय केही युवाहरू लागुऔषध दुर्व्यसनको चपेटामा पर्दै जानु अत्यन्तै दुर्भाग्यपूर्ण अवस्था भएको बताए ।
युवाहरूलाई दुर्व्यसनबाट जोगाउन तथा त्यसबाट प्रभावित भइसकेकाहरूलाई पुनर्स्थापना गर्न आफूले ठोस कार्ययोजना बनाएको सरार्फले उल्लेख गरे । उनले यस्ता युवाहरूलाई निःशुल्क उपचारको व्यवस्था गरी सीपमूलक तालिममार्फत आत्मनिर्भर बनाउने प्रतिबद्धता व्यक्त गरे । ‘युवा सशक्तीकरण बिना समाज र देशको विकास सम्भव छैन,’ उनले भने, ‘यसका लागि मेरो स्पष्ट रोडम्याप तयार छ, जसलाई कार्यान्वयनमा ल्याउन म प्रतिबद्ध छु ।’
सरार्फले वीरगंजका दीर्घकालीन सरोकारका विषयहरू, जस्तै पूर्वाधार विकास, शिक्षा, स्वास्थ्य, रोजगारी र सुरक्षित समाज निर्माणलाई प्राथमिकतामा राखेर काम गर्ने बताए । उनले मधेसको अधिकार, पहिचान र सम्मानका लागि आफू निरन्तर संघर्षरत रहेको स्मरण गराउँदै संसद तथा सम्बन्धित निकायहरूमा वीरगंज र यहाँका बासिन्दाको शिर उचो हुने गरी आवाज उठाउने अठोट व्यक्त गरे ।
उनले देश र मधेसको समस्याको दीर्घकालीन समाधानका लागि जनमत पार्टी र डा. सीके राउतसँग स्पष्ट दृष्टिकोण र प्रभावकारी योजना रहेको उल्लेख गरे । यही कारणले आगामी निर्वाचनमा ‘हर्न’ चुनाव चिन्हमा मतदान गरी जनमत पार्टीलाई जिताउन सबै मतदातासँग अपिल पनि गरे । कार्यक्रमका क्रममा स्थानीय बासिन्दाले उम्मेदवार सरार्फलाई आत्मीय स्वागत तथा सम्मान गरेका थिए ।
स्थानीयको स्वस्फूर्त सहभागिता र समर्थनले चुनावी माहोल थप उत्साहित बनेको देखिन्थ्यो । कार्यक्रममा विभिन्न स्थानीय नेता तथा समाजसेवीहरूको पनि उपस्थिति रहेको थियो । कार्यक्रममा विद्यालाल प्रसाद, भुपेन्द्र साह, डा. मनोज कुमार, सिए देवराज, महादेव शर्मा, निराजन कुशवाहा, सहनवाज राकी, अजित सिंह, मन्जय शर्मा, सुमित सिंह, संजय पटेल, नरेश अग्रवाल, अमर सरार्फलगायतका व्यक्तित्वहरूको सहभागिता रहेको थियो ।
सम्पूर्ण कार्यक्रमले जनमत पार्टीका उम्मेदवार सरार्फको चुनावी अभियानलाई थप सशक्त बनाएको छ भने स्थानीय जनतासँगको प्रत्यक्ष संवादले विकास, युवा सशक्तीकरण र मधेसको अधिकारका मुद्दाहरूलाई केन्द्रमा राख्दै सकारात्मक सन्देश प्रवाह गरेको छ ।
प्रतिक्रिया दिनुहोस् !