वीरगंज (पर्सा), २३ माघ । पर्सा निर्वाचन क्षेत्र नं. २ अन्तर्गत जनता समाजवादी पार्टी (जसपा) नेपालका उम्मेदवार अशोक टेमानीले आगामी प्रतिनिधिसभा निर्वाचनको तयारीलाई थप तीव्रता दिएका छन् । टेमानीले बिहीबार वीरगंज महानगरपालिका वडा नं. २६ सुगौलीवीर्ता लगायत महानगर क्षेत्रमा भव्य घरदैलो अभियान सञ्चालन गर्दै मतदातासँग प्रत्यक्ष भेटघाट र संवादका माध्यमबाट आफ्नो एजेन्डा प्रस्तुत गरेका छन् ।
घरदैलो कार्यक्रमको क्रममा टेमानीले स्थानीय बासिन्दासँग शिक्षा, स्वास्थ्य, रोजगारी, खानेपानी, सडक र आधारभूत सेवासम्बन्धी समस्याहरू नजिकबाट सुने । उनले मतदाताको सुझाव र अपेक्षालाई गम्भीरतापूर्वक लिँदै, आफू निर्वाचित भएपछि ती विषयलाई संसदमा प्राथमिकताका साथ उठाउने प्रतिबद्धता जनाए । उनले स्पष्ट पार्दै भने, ‘म नेता होइन, जनताको सेवक भएर काम गर्ने लक्ष्यमा छु । विगतको राजनीतिक अभ्यासभन्दा फरक र जवाफदेही शैलीको राजनीति आजको आवश्यकता हो ।’
वडा नं. २६ का मतदातासँगको प्रत्यक्ष संवादमा टेमानीले मधेश र पर्साको दीर्घकालीन विकास योजना आवश्यक रहेको औँल्याए । वीरगंजलाई आर्थिक र औद्योगिक केन्द्रका रूपमा स्थापित गर्न संघीय सरकारमा बलियो प्रतिनिधित्व आवश्यक रहेको उनको भनाइ थियो । ‘जनताको पीडा बुझ्ने, जनतासँगै हिँड्ने र जनताकै आवाज संसदमा पुर्याउने प्रतिनिधि आजको आवश्यकता हो,’ उनले थपे ।
घरदैलो अभियानमा स्थानीय मतदाताले टेमानीको सरल स्वभाव, सहज पहुँच र सक्रिय नेतृत्वको प्रशंसा गरेका छन् । विगत केही समयदेखि क्षेत्रमै निरन्तर सक्रिय रहेका उनले जनताको विश्वास जित्ने क्रममा ठोस भूमिका निर्वाह गरिरहेका छन् । यसले आगामी निर्वाचनमा टेमानीलाई व्यापक जनसमर्थन दिलाउने आशा जगाएको छ ।
जसपा नेपालले पर्सा-२ लाई यसपटक रणनीतिक रूपमा महत्व दिएको छ । त्यसअनुसार उम्मेदवार टेमानीले घरदैलो, टोलसभा र प्रत्यक्ष संवादमार्फत आफ्नो अभियानलाई अझ प्रभावकारी बनाएका छन् । उनी लगातार क्षेत्रमै रहँदै मतदातासँग घुलमिल हुँदै आएका छन्, जसले जनतामा विश्वास र उत्साह बढाएको छ । उनको अभियानमा स्थानीय युवादेखि वृद्धवृद्धासम्म समर्थन जनाई रहेका छन् ।
उम्मेदवार टेमानी मधेश प्रदेशकै सफल उद्योगी व्यवसायीका रूपमा परिचित छन् । विगत दशकौँदेखि सामाजिक सेवामा सक्रिय रहेका उनले नीतिगत स्थानमा पुगेर क्षेत्रीय समस्याको दीर्घकालीन समाधान गर्ने उद्देश्य लिएर प्रतिनिधिसभा सदस्यको उम्मेदवारी दिएका हुन् । टेमानी निर्वाचित भए वीरगंजवासी विकास, शिक्षा, स्वास्थ्य र रोजगारीमा विशेष अवसर पाउने विश्वास व्यक्त गरिएको छ ।
उनी भाषण भन्दा काममुखी व्यक्तित्वका धनी हुन् । उद्योग वाणिज्य महासंघ मधेश प्रदेशको नेतृत्वसमेत गरिसकेका टेमानी विभिन्न संघसंस्थामा अध्यक्ष भएर नेतृत्व प्रदान गरिसकेका छन् । यसै अनुभव र सक्रियताका आधारमा उनी जनताको सेवा र विकासलाई प्राथमिकतामा राख्दै निर्वाचनको मैदानमा अगाडि बढेका छन् ।
यसरी घरदैलो, टोलसभा र प्रत्यक्ष संवादमार्फत मतदातासँग जोडिएर आफ्नो अभियानलाई सशक्त बनाइरहेका अशोक टेमानीले पर्सा–२ मा जनता समाजवादी पार्टीको बलियो उपस्थिती र सकारात्मक सन्देश फैलाइरहेका छन् । उनका अभियानका माध्यमबाट मतदातामा विकास र सेवामा केन्द्रित आशा जागेको छ, जसले आगामी निर्वाचनमा जनताको सक्रिय सहभागिता र व्यापक समर्थन सुनिश्चित गर्ने अपेक्षा गरिएको छ ।
प्रतिक्रिया दिनुहोस् !