वीरगंज (पर्सा), २१ माघ । नेपाली कम्युनिष्ट पार्टी (नेकपा) पर्सा निर्वाचन क्षेत्र नम्बर–२ का प्रतिनिधिसभा सदस्य उम्मेदवार मनोज चौधरीले वीरगंज महानगरपालिका वडा नम्बर-२५ स्थित सिर्सियामा युवा भेला सम्पन्न गरेका छन् ।
भेलालाई सम्बोधन गर्दै उम्मेदवार चौधरीले नेकपासँग स्पष्ट एजेन्डा र समाजवादी आन्दोलनको ठोस मार्गचित्र रहेको उल्लेख गर्दै युवाहरूलाई एकजुट भई पार्टीको पक्षमा उभिन आह्वान गरे। उनले नेकपा सधैं गरिब, श्रमिक तथा सर्वहारा वर्गको हक–हितका लागि संघर्षरत रहँदै आएको बताए ।
चौधरीले देशमा देखिएका विभिन्न विध्वंस र अस्थिरताका लागि नेकपा एमाले जिम्मेवार रहेको दाबी गर्दै परिवर्तनका लागि वैकल्पिक राजनीतिक शक्तिको आवश्यकता रहेको धारणा व्यक्त गरे । भेलामा नेकपाका केन्द्रीय सदस्य रामचन्द्र साह, बृजलाल पासवान, नेता रामाश्रय राम, वीरेंद्र यादवलगायतका नेताहरूको उपस्थिति रहेको थियो ।
यसैक्रममा उम्मेदवार चौधरीले आजै पर्सागढी नगरपालिकाको वडा नम्बर-७ र ९ अन्तर्गत टिकुलिया–एकटङ्गा तथा बडेरवा क्षेत्रमा घरदैलो कार्यक्रमसमेत सम्पन्न गरेका छन् । घरदैलोका क्रममा उनले स्थानीय मतदातासँग प्रत्यक्ष संवाद गर्दै पार्टीका नीति, कार्यक्रम तथा प्रतिबद्धताबारे जानकारी गराए ।
घरदैलो कार्यक्रममा नेकपाका सुशील हजरा, दीपेन्द्र सिंह पटेल, सोम लामा, जीवन राम, टेकनारायण महतो लगायतका अगुवा कार्यकर्ता तथा नेताहरूको सक्रिय सहभागिता रहेको थियो ।
प्रतिक्रिया दिनुहोस् !