वीरगंज (पर्सा), १९ माघ । पर्सा क्षेत्र नम्बर–१ अन्तर्गत वीरगंज महानगरपालिका वडा नं.–२० अपौनि–हारपतगन्ज क्षेत्रमा जनमत पार्टीका प्रतिनिधिसभा सदस्य उम्मेदवार ओमप्रकाश सरार्फले व्यापक घरदैलो, भेटघाट तथा कोणसभा कार्यक्रम सम्पन्न गरेका छन् । स्थानीय टोलबस्तीमा पुगेर मतदातासँग प्रत्यक्ष संवाद गर्दै सरार्फले जनमत पार्टीको राजनीतिक दृष्टिकोण, मधेसका मुद्दा र वीरगंजको विकाससँग जोडिएका सवालहरू उठाएका थिए ।
कार्यक्रमका क्रममा उम्मेदवार सरार्फले विगतका मधेश आन्दोलन तथा जेन्जी आन्दोलनको प्रसङ्ग उल्लेख गर्दै नेपाली कांग्रेस, एमाले लगायतका ठूला दलहरूलाई कठोर शब्दमा आलोचना गरे । उनले आन्दोलनका क्रममा निर्दोष युवाहरूले ज्यान गुमाउनु परेको घटनालाई स्मरण गराउँदै ती दलहरूले मधेश र विशेषगरी वीरगंजप्रति न्याय नगरेको आरोप लगाए । ‘वीरगंजलाई विकासको केन्द्रका रूपमा होइन, केवल राजस्व असुल्ने साधनका रूपमा प्रयोग गरिएको छ,’ भन्दै उनले संघीय सरकारको नीति र प्राथमिकतामाथि प्रश्न उठाए ।
सरार्फले आफू निर्वाचित भए वीरगंजप्रति हुँदै आएको विभेद अन्त्य गर्न र विकासको मूलधारमा जोड्न संघर्ष गर्ने प्रतिबद्धता व्यक्त गरे । उनले जनमत पार्टी र डा. सीके राउतसँग मात्रै देश र मधेशको निकासको स्पष्ट र दूरदर्शी विजन रहेको दाबी गर्दै मतदातालाई ‘हर्न’ चुनाव चिन्हमा मतदान गर्न अपिल गरे ।
उक्त कार्यक्रममा जनमत पार्टीका स्थानीय तथा क्षेत्रीय नेताहरूको उल्लेखनीय सहभागिता थियो । बिध्या गुप्ता, रम्भा मिश्रा, भुपेन्द्र साह, डा. मनोज कुमार, सिए देवराज, महादेव शर्मा, निराजन कुशवाहा, सहनवाज राकी, अजित सिंह, मन्जय शर्मा, सुमित सिंह, अन्जना गुप्ता, बबिता पुडासैनि, नरेश राम, सत्युग साह लगायतका नेताहरूले पनि जनमत पार्टीको पक्षमा मतदातासँग संवाद गरेका थिए ।
पर्सा क्षेत्र नम्बर–१ परम्परागत रूपमा ठूला दलहरूको प्रभाव रहेको क्षेत्र मानिन्छ । तर पछिल्लो समय मधेशकेन्द्रित राजनीतिक शक्ति, विशेषगरी जनमत पार्टी, यहाँ आफ्नो आधार विस्तार गर्न सक्रिय देखिएको छ । घरदैलो र साना कोणसभामार्फत जनताको घरदैलोसम्म पुग्ने रणनीतिले जनमत पार्टीले ‘ग्रासरुट कनेक्ट’ निर्माण गर्न खोजेको स्पष्ट देखिन्छ ।
ओमप्रकाश सरार्फले उठाएका मुद्दाहरू मधेश आन्दोलनका सहिद, वीरगंजप्रति राज्यको विभेद, र विकासको असमानता स्थानीय जनभावनासँग प्रत्यक्ष जोडिएका विषय हुन् । वीरगंज आर्थिक हिसाबले मुलुककै प्रमुख व्यापारिक नाका भए पनि पूर्वाधार, स्वास्थ्य, शिक्षा र शहरी व्यवस्थापनका दृष्टिले अपेक्षाकृत पछाडि रहेको गुनासो यहाँ लामो समयदेखि सुनिँदै आएको छ । यस असन्तोषलाई जनमत पार्टीले राजनीतिक एजेण्डाका रूपमा उठाएर मतदातालाई प्रभावित पार्ने प्रयास गरिरहेको देखिन्छ ।
अर्कोतर्फ, ठूला दलहरू विरुद्ध ‘उपेक्षा’ र ‘अन्याय’ को भाष्य निर्माण गर्नु जनमत पार्टीको चुनावी रणनीतिको मुख्य भाग बनेको छ । यो रणनीति सफल भएमा परम्परागत दलहरूलाई चुनौती दिने सम्भावना बढ्छ । विशेषगरी युवा मतदाता र आन्दोलनप्रति सहानुभूति राख्ने समुदाय जनमत पार्टीतर्फ आकर्षित हुन सक्ने विश्लेषकहरू बताउँछन् ।
प्रतिक्रिया दिनुहोस् !