वीरगंज (पर्सा), १३ माघ । प्रतिनिधिसभा सदस्य निर्वाचनका लागि नेपाली काँग्रेसबाट पर्सा क्षेत्र नं. १ का उम्मेदवार अनिल रुङ्गटालाई विजयी गराउन मुस्लिम समुदायहरु एकजुट भएका छन् । नेपाल मुस्लिम संघ पर्साको आयोजनामा परवानीपुर स्थित सम्पन्न बैठकमा रुङ्गटालाई विजयी बनाउन मुस्लिम समुदायका अगुवाहरु एकजुट भएका हुन् । उनीहरुले बैठकमा रुङ्गटालाई विजयी बनाउन हरेक संघर्ष गर्ने प्रतिबद्धता जनाएका छन् ।
बैठकलाई सम्बोधन गर्दै नेपाली कांग्रेस पर्साका कार्यवाहक सभापति रामनारायण कुर्मीले नेपाली कांग्रेस सधैं समावेशी लोकतन्त्र, सामाजिक न्याय र अल्पसंख्यक समुदायको अधिकारको पक्षमा दृढतापूर्वक उभिँदै आएको बताएका थिए । उनले क्षेत्र नं. १ का उम्मेदवार अनिल रुङटा जनताको दुःख सुख बुझ्ने, इमानदार तथा विकासप्रति प्रतिबद्ध नेता भएको उल्लेख गर्दै सबै समुदायलाई एकताबद्ध भएर निर्वाचनमा कांग्रेसलाई बिजयी आग्रह गरे ।
नेपाली कांग्रेस पर्साका पूर्व सभापति अजय कुमार द्विवेदीले मधेश, मुस्लिम समुदाय तथा आम नागरिकको अधिकार सुनिश्चित गर्न नेपाली कांग्रेसले ऐतिहासिक भूमिका निर्वाह गर्दै आएको बताए । उनले अवसरवाद र व्यक्तिगत स्वार्थका कारण विचार परिवर्तन गर्ने प्रवृत्तिले जनताको विश्वास गुमाउने भन्दै स्थायित्व र लोकतान्त्रिक मूल्यका लागि कांग्रेसको विकल्प नरहेको धारणा व्यक्त गरे ।
नेपाल मुस्लिम संघ पर्साका अध्यक्ष हबिब मियाँले उम्मेदवार अनिल रुङटा मुस्लिम समुदायका भावना बुझ्ने र सधैं साथ दिने नेता भएको बताए । उनले भौतिक पूर्वाधार विकासदेखि शिक्षा, स्वास्थ्य तथा रोजगारीका सवालमा रुङटासँग स्पष्ट दृष्टिकोण रहेको उल्लेख गर्दै मुस्लिम समुदाय एकजुट भएर उनको समर्थनमा उभिएको बताए ।
बैठकमा उम्मेदवार अनिल रुङ्गटाले सबै समुदायलाई साथमा लिएर क्षेत्रको समग्र विकास गर्ने प्रतिबद्धता जनाएका छन् । उनले मुस्लिम समुदायसहित मधेशी, दलित, महिला र युवाको अधिकार सुनिश्चित गर्न नेपाली कांग्रेसको नीति तथा कार्यक्रमअनुसार इमानदार प्रयास गर्ने बताए ।
त्यसैगरि बैठकमा बोल्दै नेपाल मुस्लिम संघ पर्साका सचिव तबरेज मियाँले प्रदीप यादव मधेशी एजेण्डाबाट उदाएका नेता भएपनि मधेश आन्दोलनका बेला एमालेको विरोध गर्ने व्यक्ति आज व्यक्तिगत स्वार्थका लागि सहिदको इमान बेचेर एमाले प्रवेश गरेको आरोप लगाए ।
नेपाल मुस्लिम संघ पर्साका अध्यक्ष हबिब मियाँको अध्यक्षतामा आयोजित बैठकमा नेपाली कांग्रेस पर्साका कार्यवाहक सभापति रामनारायण कुर्मी, पूर्व सभापति अजय कुमार द्विवेदी, सचिव इम्तियाज आलम, क्षेत्र नं. १ का क्षेत्रीय सभापति अरबिन्द गुप्ता, क्षेत्र नं. २ का क्षेत्रीय सभापति तथा नेपाल मुस्लिम संघका केन्द्रीय उपाध्यक्ष मो. साहबुद्दिनलगायत पार्टीका कार्यकर्ता र मुस्लिम संघका जनप्रतिनिधिहरूको उल्लेखनीय उपस्थिति रहेको थियो ।
प्रतिक्रिया दिनुहोस् !