गौर (रौतहट), ११ माघ । तत्कालीन लोकतान्त्रिक समाजवादी पार्टी नेपालका केन्द्रीय सह-महामन्त्री अनिल कुमार सिंहले केपी शर्मा ओली नेतृत्वको नेकपा (एमाले) लाई मधेशबाट बहिष्कार गर्नुपर्ने बताएका छन् । पछिल्लो समय ओली तथा एमाले नेता महेश बस्नेतबाट सार्वजनिक रूपमा आएका मधेशी विरोधी अभिव्यक्तिले मधेशभर आक्रोश फैलिएको भन्दै उनले अब एमालेका पक्षमा भोट हाल्नुको कुनै औचित्य नरहेको बताएका हुन् ।
जनकपुरमा आयोजित आमसभालाई सम्बोधन गर्दै सिंहले राष्ट्रिय स्वतन्त्र पार्टीका वरिष्ठ नेता तथा प्रधानमन्त्रीका उम्मेदवार बालेन्द्र साहले प्रयोग गरेको ‘मधेशी छौडा’ मैथिली शब्दलाई अपव्याख्या गर्दै महेश बस्नेतले ‘मधेशी कुकुरको बच्चा’ भनेर गरेको कटाक्ष र केपी शर्मा ओलीले धनुषा–महोत्तरीलाई फोहरी जिल्ला तथा दमकलाई सफा र सुन्दर क्षेत्र भनेको अभिव्यक्ति मधेश र मधेशी जनताको घोर अपमान भएको ठहर गरे ।
मधेशले अधिकार र पहिचानका लागि लामो समयदेखि संघर्ष गरिरहेको सन्दर्भ स्मरण गराउँदै सिंहले ओलीले यसअघि दिएको ‘२–४ वटा आँप झर्दैमा केही फरक पर्दैन’ तथा ‘मानव साङ्गलो माखे साङ्गलो जस्तो’ भन्ने अभिव्यक्तिहरू पनि मधेशी जनतामाथिको अपमानजनक सोचको निरन्तरता भएको आरोप लगाए । पटक–पटक गाली र विभेद झेल्दै आएका मधेशी जनताले अब एमालेमाथि मतपत्रमार्फत जवाफ दिनुपर्ने समय आएको उनले बताए ।
आउँदो फागुन २१ गते हुने प्रतिनिधिसभा निर्वाचनमा मधेशी जनता, थारु, मुस्लिम, अल्पसंख्यक, पिछडिएको वर्ग, महिला तथा उत्पीडित समुदायलाई अपमान र शोषण गर्ने शासक वर्गका रूपमा एमाले र कांग्रेसलाई सबक सिकाउन सचेत भएर मत प्रयोग गर्नुपर्ने सिंहको आग्रह छ ।
ओली र बस्नेतको पछिल्लो अभिव्यक्तिका कारण रौतहटमा एमालेका उम्मेदवार गम्भीर संकटमा परेको र पार्टीप्रति नकारात्मक जनभावना तीव्र रूपमा बढ्दै गएको सिंहले दाबी गरे । यसै कारण आगामी निर्वाचनमा एमाले उम्मेदवारलाई जित निकाल्न अत्यन्त कठिन हुने अवस्था सिर्जना भएको अनुमान गरिएको छ ।
प्रतिक्रिया दिनुहोस् !