वीरगंज (पर्सा), १० माघ । पर्सा जिल्लाको निर्वाचन क्षेत्र नं. ३ मा नेकपा एमालेको क्षेत्रीय समन्वय कमिटीको बैठक सम्पन्न भएको छ । आगामी प्रतिनिधिसभा निर्वाचनलाई केन्द्रमा राखेर आयोजित उक्त भेलामा चुनावी रणनीति, संगठन सुदृढीकरण तथा पार्टीपंक्तिको प्रभावकारी परिचालनबारे गहन छलफल गरिएको थियो ।
बैठककै क्रममा नेपाली कांग्रेस निकट तरुण दल पर्सा सचिव सन्तोष महतो, राष्ट्रिय मुक्ति पार्टीका सदाम हुसैनसहित पोखरिया नगरपालिका वडा नं. ८ मननपुरका खरदार मिया, औरन्जेव अंसारी, मयोनदिन मिया, रामनाथ सहनी, रामबाबु सहनी, मजिद राय, मोति मुखिया बिन, परशुराम मिश्रलगायत दुई दर्जनभन्दा बढी नेता तथा कार्यकर्ताहरू नेकपा एमालेमा प्रवेश गरेका छन् । नवप्रवेशीहरूलाई एमाले नेताहरूले खादा र टीका लगाएर पार्टीमा स्वागत गरेका थिए ।
भेलालाई सम्बोधन गर्दै नेकपा एमाले पर्सा–३ का प्रतिनिधिसभा सदस्यका उम्मेदवार रूपेश कुमार पाण्डेले पर्सा–३ लाई विकास, सुशासन र अवसरका दृष्टिले देशकै नमुना निर्वाचन क्षेत्र बनाउने दृढ संकल्प व्यक्त गरे। उनले युवाको ऊर्जा, अनुभवी नेतृत्वको मार्गदर्शन र जनताको भरोसामा आधारित समावेशी विकासको खाका प्रस्तुत गर्दै रोजगारी सिर्जना, पूर्वाधार विकास, शिक्षा र स्वास्थ्य क्षेत्रलाई प्रमुख प्राथमिकतामा राख्ने बताए ।
क्षेत्रीय समन्वय कमिटीका अध्यक्ष फर्मान मियाको अध्यक्षता तथा नेकपा एमाले केन्द्रीय कमिटी सदस्य एवं पर्सा जिल्ला इन्चार्ज प्रभु हजराको प्रमुख आतिथ्यमा सम्पन्न बैठकमा पार्टीका शीर्ष तथा प्रभावशाली नेताहरूको उल्लेखनीय उपस्थिति रहेको थियो ।
कार्यक्रममा केन्द्रीय सदस्य निर्मला देवकोटा, केन्द्रीय सल्लाहकार परिषद सदस्य शिव पटेल, मधेश प्रदेश उपाध्यक्ष बिचारी यादव, पर्सा जिल्ला अध्यक्ष विश्वम्भर शर्मा, पूर्व मन्त्री एवं प्रदेश सभा सदस्य प्रमोद जयसवाल, सखुवा प्रसौनी गाउँपालिका प्रमुख जसवन्त यादव, युवा नेता अनिल हजरा, अकलेश कुमार साह, कौशल साहलगायत प्रदेश, जिल्ला र पालिका तहका पदाधिकारी तथा कार्यकर्ताहरूको सहभागिता रहेको थियो ।
प्रतिक्रिया दिनुहोस् !