वीरगंज (पर्सा), २१ पुस । वीरगंजस्थित हरिखेतान बहुमुखी क्याम्पसमा व्यवस्थापन पक्षको मनोमानी निर्णय र क्याम्पसलाई निजीकरणतर्फ धकेल्ने प्रयास भइरहेको आरोप लगाउँदै विद्यार्थीहरूले आजदेखि खुला रूपमा विरोध आन्दोलन सुरु गरेका छन् । व्यवस्थापनका निर्णयहरूले शैक्षिक वातावरणमा नकारात्मक असर परेको भन्दै विद्यार्थीहरू आन्दोलित बनेका हुन् ।
विवादको केन्द्रमा क्याम्पस व्यवस्थापन पक्षले सुस्मिता यादव नाम गरेकी एक महिलालाई संयोजक पदमा नियुक्ति दिएको विषय रहेको छ । विद्यार्थीहरूका अनुसार उक्त नियुक्ति पारदर्शी प्रक्रिया नअपनाई गरिएको हो, जसका कारण क्याम्पसभित्र असन्तोष चुलिएको छ । व्यवस्थापन पक्षले आफ्नो मनोमानी रुपमा विवादस्थपद नियुक्ति गरेको विद्यार्थीहरुको आरोप छ ।
आज बिहानैदेखि विद्यार्थीहरू क्याम्पसको मुख्य गेट अगाडि भेला भई धर्नामा बसेका थिए । त्यसपछि उनीहरूले ठूलो संख्यामा र्याली निकाल्दै वीरगंज बजारका मुख्य सडकहरू परिक्रमा गरेका थिए । र्याली जिल्ला प्रशासन कार्यालय पर्सा पुगेपछि त्यहाँ पनि केही समय धर्ना दिँदै चर्को नाराबाजी गरिएको थियो । प्रदर्शनका क्रममा विद्यार्थीहरूले ‘क्याम्पस निजीकरण बन्द गर’, ‘व्यवस्थापन पक्षको मनोमानी मुर्दावाद’, ‘विद्यार्थीको सुविधा बढाऊ’ जस्ता नारा लगाएका थिए ।
विद्यार्थीहरूका अनुसार क्याम्पस प्रशासनले पूर्वाधार विकास, कक्षाकोठा व्यवस्थापन, प्रयोगशाला उपकरणको अभाव तथा विद्यार्थी यातायात सुविधाको व्यवस्था गर्न पटक पटक व्यवस्थापन पक्षको ध्यानाकर्षण गराउँदै आएपनि ती मागहरूलाई निरन्तर बेवास्ता गरिएको छ । उनीहरूको आरोपमा व्यवस्थापन पक्षले शैक्षिक सुधारभन्दा पनि आफ्ना नजिकका व्यक्तिहरूलाई नियुक्ति दिएर तलब भत्ता वितरण गर्ने, क्याम्पसलाई भर्ती केन्द्रका रूपमा प्रयोग गर्ने काम गरिरहेको छ । सुस्मिता यादवको नियुक्तिलाई पनि यही श्रृङ्खलाको एक अंशका रूपमा विद्यार्थीहरूले हेरेका छन् ।
विद्यार्थीहरूले व्यवस्थापन पक्षले क्याम्पस प्रशासनलाई अधिकारविहीन बनाउँदै सबै निर्णय आफ्नो हातमा केन्द्रित गरेको आरोप पनि लगाएका छन् । ‘यसका कारण क्याम्पसको शैक्षिक वातावरण दिनानुदिन बिग्रँदै गएको छ र हाम्रो भविष्यसँग खेलबाड भइरहेको छ,’ आन्दोलनरत एक विद्यार्थीले बताए ।
यस आन्दोलनमा विद्यार्थीहरू मात्र नभई क्याम्पसका शिक्षक, कर्मचारी तथा प्रशासन पक्षका व्यक्तिहरूको समेत नैतिक समर्थन रहेको बताइएको छ । उनीहरूले पनि व्यवस्थापनको निर्णयप्रति असहमति जनाउँदै मागहरू सम्बोधन नभए आन्दोलनमा सक्रिय रूपमा साथ दिने चेतावनी दिएका छन् ।
श्रोतका अनुसार हरिखेतान बहुमुखी क्याम्पसमा यसअघि पनि यस्तै प्रकृतिका विवादहरू पटक पटक उठ्दै आएको छ । नियुक्ति प्रक्रियामा पारदर्शिता नअपनाइएको र आर्थिक अनियमितता भएको आरोप यसअघि पनि लाग्दै आएको थियो ।
विद्यार्थीहरूले क्याम्पसलाई सार्वजनिक र गुणस्तरीय शैक्षिक संस्थाको रूपमा सञ्चालन गर्नुपर्ने, नियुक्ति प्रक्रियामा पूर्ण पारदर्शिता कायम गर्नुपर्ने तथा विद्यार्थी सुविधामा पर्याप्त लगानी बढाउनुपर्ने मुख्य माग अघि सारेका छन् । मागहरू तत्काल सम्बोधन नभए आन्दोलनलाई निरन्तरता दिने र आवश्यक परे अनिश्चितकालीन तालाबन्दीसम्मको कार्यक्रम घोषणा गर्ने चेतावनीसमेत दिएका छन् ।
यस विषयमा क्याम्पस व्यवस्थापन पक्षबाट हालसम्म कुनै आधिकारिक प्रतिक्रिया प्राप्त भएको छैन । यद्यपि जिल्ला प्रशासन कार्यालय पर्साले दुवै पक्षसँग छलफल गरेर समस्या समाधानको प्रयास गरिने जनाएको छ । 
प्रतिक्रिया दिनुहोस् !