ईश्वरपुर (सर्लाही), १९ पुस । सर्लाहीको ईश्वरपुर नगरपालिका-२ राईटरखोरस्थित सागरनाथ वन विकास परियोजनामा कार्यरत एकजना वन चौकीदारको टाउको अलग भएको अवस्थामा शव फेला परेको छ । घटनाले स्थानीय क्षेत्रमा सनसनी फैलिएको छ ।
ज्यालादारीमा कार्यरत राईटरखोरकै ४७ वर्षीय रामईश्वर महतोको शव घरदेखि करिब ५ सय मिटर टाढा सागरनाथ वन विकास परियोजनाको जंगलभित्र टाउको विनाको अवस्थामा भेटिएको सर्लाही प्रहरीका प्रवक्ता डीएसपी सरोज राईले जानकारी दिए ।
स्थानीयका अनुसार आज बिहान करिब ५ बजेतिर जंगलतर्फबाट रूख काटिएको जस्तो आवाज आएको थियो । सो आवाज सुनेर केही स्थानीय त्यसतर्फ गएका थिए । तर, दिउँसोसम्म पनि महतो घर नफर्किएपछि र उनको मोबाइल फोन ‘स्वीच अफ’ देखिएपछि परिवारका सदस्य र स्थानीयवासीले खोजी सुरु गरेका थिए ।
खोजतलासका क्रममा जंगलभित्र अत्यन्तै विभत्स अवस्थामा टाउको अलग गरिएको महतोको शव फेला परेको डीएसपी राईले बताए । हालसम्म शवको टाउको भने फेला नपरेको र त्यसको खोजी कार्य जारी रहेको प्रहरीले जनाएको छ ।
‘घटनास्थलमै शवको मुचुल्का उठाउने काम भइरहेको छ । टाउको अझै भेटिएको छैन,’ डीएसपी राईले भने । घटनाको गम्भीरताका कारण साँझ धनुषाको लालगढबाट तालिम प्राप्त खोजी कुकुर (स्निफर डग) झिकाएर प्रहरीले थप अनुसन्धान अघि बढाएको छ ।
प्रहरीले घटनाको कारण र संलग्न व्यक्तिबारे अनुसन्धान तीव्र बनाएको जनाएको छ । विभत्स हत्या घटनाले सिंगो क्षेत्रमा त्रास र आक्रोश फैलिएको छ । 
प्रतिक्रिया दिनुहोस् !