कलैया (बारा), १८ पुस । बारा जिल्लाको भारतसँग जोडिएको सीमावर्ती क्षेत्रमा नेपाल प्रहरीकै एक अधिकृतको हातबाट सरकारी पेस्तोल खोसेर तस्कर समूह फरार भएको सनसनीपूर्ण घटना सार्वजनिक भएको छ । तर, घटना भएको एक हप्ताभन्दा बढी समय बितिसक्दासमेत बारा प्रहरीले यस विषयलाई गोप्य राखेको आरोप लागेपछि प्रहरी प्रशासनमाथि गम्भीर प्रश्न उठेको छ ।
जिल्ला प्रहरी कार्यालय बारा मातहतको इलाका प्रहरी कार्यालय कवहीगोठमा कार्यरत प्रहरी नायब निरीक्षक (सई) सोनुकुमार मिश्रले ड्युटीका क्रममा बोकेको सरकारी ‘नाइन एन’ पेस्तोल तस्कर समूहले खोसेर लगेको श्रोतको दाबी छ । पुस ११ गते शुक्रबार साँझ सीमावर्ती क्षेत्रमा तस्करी नियन्त्रणका क्रममा सई मिश्रले तस्करहरूतर्फ पेस्तोल ताक्ने बित्तिकै उनीहरूको समूहले हतियार समातेपछि घटनास्थलबाट फरार भएको बताइएको छ ।
प्रहरी श्रोतका अनुसार, सई मिश्र आफ्नो कार्यक्षेत्रमा कमजोर अधिकृतको रूपमा चिनिँदै आएका थिए । यस्तो अवस्था जानकारी हुँदाहुँदै पनि जिल्ला प्रहरी कार्यालयले उनलाई समयमै प्रतिस्थापन नगर्दा तस्कर समूहले सजिलै अवसर पाएको आरोप उठेको छ । सीमावर्ती क्षेत्रमा प्रहरी व्यवस्थापनमै चरम लापरबाही भएको भन्दै आलोचना चर्किंदै गएको छ ।
अझ गम्भीर पक्ष के भने, घटना भएको एक साताभन्दा बढी समय बितिसक्दा पनि लुटिएको पेस्तोल अहिलेसम्म फेला परेको छैन । तस्कर समूह प्रहरीकै हतियार लिएर खुलेआम हिँडिरहेको हुनसक्ने आशङ्का गरिए पनि प्रहरीले हालसम्म हतियार बरामद गर्न सकेको छैन, जसले सुरक्षा अवस्था झनै चिन्ताजनक बनाएको छ ।
घटना बाहिरिएपछि मात्रै मधेस प्रदेश प्रहरी कार्यालय सक्रिय भएको देखिएको छ । बिहीबार मधेस प्रदेश प्रहरी कार्यालयले प्रहरी उपरीक्षक (एसपी) भेषराज रिजालको संयोजकत्वमा छानबिन समिति गठन गरेको छ ।
यसैबीच, बारा प्रहरीका निमित्त प्रवक्ता प्रहरी निरीक्षक सुरेश राज भट्टले सरकारी पेस्तोल हराएको पुष्टि गर्दै छानबिन प्रक्रिया सुरु भइसकेको जानकारी दिए । यद्यपि, उनले तस्कर समूहले पेस्तोल लुटेको भन्ने आरोप अस्वीकार गरे । ‘त्यस्तो होइन, तस्कर समूहले लुटेको भन्ने कुरा गलत हो, हामी छानबिन गरिरहेका छौँ,’ उनले भने ।
उनका अनुसार सई मिश्रले पेस्तोल कार्यालय परिसरमै हराएको दाबी गरेका छन् । तर, प्रहरीको प्रारम्भिक अनुमानअनुसार गस्तीमा गएको बेला खसेर हराएको हुनसक्ने आशङ्का गरिएको छ । ‘यसअघि पनि यस्ता घटनाहरू भएका छन्। अनुसन्धानका लागि समिति गठन भइसकेको छ, छिट्टै यथार्थ बाहिर आउनेछ,’ भट्टले बताए ।
यसअघि पनि यस्तै प्रकृतिको घटना सार्वजनिक भइसकेको छ । गत वर्ष वैशाखमा इलाका प्रहरी कार्यालय अमलेखगञ्जमा कार्यरत सई पूर्ण बिसीको अटोमेटिक पेस्तोल हराएको थियो । त्यतिबेला पनि तस्करलाई पक्राउ गर्ने क्रममा हतियार खसेर हराएको दाबी गरिएको भएपनि तस्कर समूहले नै खोसेको आशङ्का व्यापक थियो ।
यो घटना बारामा प्रहरीको लापरबाही र कमजोर व्यवस्थापनको एउटा उदाहरण मात्र भएको स्थानीयको भनाइ छ । भारतीय राज्य बिहारसँग जोडिएको बाराका विभिन्न नाकाबाट प्रहरीकै मिलेमतोमा भन्सार छलेर दैनिक रूपमा तस्करी हुने गरेको, साथै प्रतिबन्धित लागूऔषधको ओसारपसार निर्बाध रूपमा भइरहेको आरोप स्थानीयले लगाउँदै आएका छन् ।
प्रहरीको यस्तो लापरबाही र सम्भावित संलग्नताकै कारण पछिल्लो समय बारा जिल्ला लागूऔषध र भन्सार छली तस्करीको प्रमुख हबको रूपमा विकास हुँदै गएको बताइन्छ । सीमावर्ती क्षेत्रमा प्रभावकारी गस्ती र अनुगमनको अभावमा तस्करहरू निर्धक्कसँग क्रियाकलाप गरिरहेका छन् ।
कमजोर वा अयोग्य अधिकृतहरूलाई संवेदनशील जिम्मेवारी दिनु, गम्भीर घटनाहरूलाई ढाकछोप गर्ने प्रयास गर्नु र समयमै कारबाही नहुनुले प्रहरी संगठनको विश्वसनीयता गुम्दै गएको स्थानीयको गुनासो छ । तस्करहरूले प्रहरीकै हतियार बोकेर हिँड्ने अवस्था सिर्जना हुनुले सुरक्षा स्थिति कति कमजोर बनेको छ भन्ने स्पष्ट संकेत गर्दछ ।
स्थानीयवासीहरूका अनुसार, यस्ता घटनालाई गम्भीरतापूर्वक लिएर दोषीमाथि कडा कारबाही नगरे तस्करी झनै मौलाउने खतरा बढ्नेछ । बारामा तस्करी नियन्त्रण र सीमावर्ती सुरक्षालाई मजबुत बनाउन तत्काल कडा कदम चाल्नुपर्ने माग स्थानीय स्तरबाट तीव्र रूपमा उठ्न थालेको छ । 
प्रतिक्रिया दिनुहोस् !