वीरगंज (पर्सा), १३ पुस । नेपाली कम्युनिष्ट पार्टी (नेकपा) पर्साले आउँदो फागुन २१ गते हुने प्रतिनिधि सभा सदस्य निर्वाचनका लागि पर्सा जिल्लाका चारै निर्वाचन क्षेत्रबाट प्रत्यक्ष तथा समानुपातिक तर्फका उम्मेदवारहरूको नाम सिफारिस गरी केन्द्रमा पठाएको छ ।
पार्टीको विशेष सर्कुलरअनुसार जिल्लास्तरीय छलफल तथा परामर्शपछि उम्मेदवारहरूको नामावली सिफारिस गरिएको नेकपाका नेता गंगा खड्काले जानकारी दिए । उनका अनुसार प्रत्यक्ष र समानुपातिक दुवै प्रणालीअन्तर्गत योग्य, अनुभवी र पार्टीप्रति प्रतिबद्ध नेताहरूको नाम सिफारिस गरिएको हो ।
नेकपाले पर्सा निर्वाचन क्षेत्र नम्बर १ बाट प्रत्यक्ष तर्फ रामदरस कुशवाहा, सुरेन्द्र गुप्ता, प्रभु यादव र सब्बा अंसारीको नाम सिफारिस गरेको छ । त्यसैगरी, निर्वाचन क्षेत्र नम्बर २ बाट प्रत्यक्ष तर्फ मनोज चौधरी, सत्यनारायण रौनियार र प्रभाकर गुप्ताको नाम सिफारिस गरिएको छ ।
यस्तै, पर्सा निर्वाचन क्षेत्र नम्बर ३ बाट प्रत्यक्ष तर्फ रामबाबु बैठा, छोटेलाल यादव र बिक्रम चौरसियाको नाम सिफारिस भएको छ भने निर्वाचन क्षेत्र नम्बर ४ बाट प्रत्यक्ष तर्फ बलराम साह, जयप्रकाश थारु र मैनेजर साह उम्मेदवारका रूपमा सिफारिस भएका छन् ।
समानुपातिक तर्फ पर्सा निर्वाचन क्षेत्र नम्बर १ बाट बालगोपाल थापा, बाबुराम कौशिक, हिरा भट्टराई, दुर्गा क्षेत्री, अफसाना खातून, डा. राजू बैठा, नन्द किशोर पंजियार, गजाधर पटेल, कदम रसूल, मंजुर समानी, मंजू आलम, सलाम अंसारी र राजकुमार यादवको नाम सिफारिस गरिएको छ ।
त्यसैगरी, पर्सा निर्वाचन क्षेत्र नम्बर २ बाट समानुपातिक तर्फ चिरञ्जीवि आचार्य, रामाश्रे राम, बलराम उपाध्याय, रामस्वरुप राम, सावित्री पोखरेल, बृजलाल पसवान, मेवालाल साह, विपिन यादव र रामेश्वर धानुकको नाम सिफारिस भएको छ ।
पर्सा निर्वाचन क्षेत्र नम्बर ३ बाट समानुपातिक तर्फ किशोरी प्रसाद कुशवाहा, शिवजी प्रसाद सोनी, बालेश्वर थारु, सुनिता चौरसिया, लाल बिहारी राम, प्रहलाद गिरी र निरोज अहमदको नाम सिफारिस गरिएको छ भने निर्वाचन क्षेत्र नम्बर ४ बाट समानुपातिक तर्फ विजय प्रसाद महतो, शेषचाँद तारा कुमारी, हरेन्द्र हजरा, प्रतिमा गुप्ता, भोला महतो थारु, जियाउल हसन र लोकमान थापाको नाम सिफारिस गरिएको छ ।
सिफारिस पत्रमा नेकपा माओवादी केन्द्र पर्साका इन्चार्ज विजय महतो थारु, जिल्ला संयोजक रामदरश कुशवाहा, नेकपा (एकीकृत समाजवादी) पर्साका अध्यक्ष बालगोपाल थापा, सह–इन्चार्ज मनोज चौधरी, जसपाका केन्द्रीय सदस्य शिवजी प्रसाद सोनी, जनसमाजवादी पार्टी नेपालका केन्द्रीय सदस्य सत्यनारायण रौनियार तथा नेपाल समाजवादी पार्टीका केन्द्रीय सदस्य फिरोज बादशाहको हस्ताक्षर रहेको छ ।
पार्टी नेतृत्वले सिफारिस गरिएका उम्मेदवारहरूलाई केन्द्रबाट अन्तिम निर्णयपछि औपचारिक उम्मेदवार घोषणा गरिने जनाएको छ ।
प्रतिक्रिया दिनुहोस् !