वीरगंज (पर्सा), ६ पुस । पर्सा जिल्लाको जिराभवानी गाउँपालिकामा प्रमुख प्रशासकीय अधिकृत अमित कुमार गिरीले शुक्रबारदेखि औपचारिक रूपमा आफ्नो कार्यभार सम्हालेका छन् । सामान्य प्रशासन मन्त्रालयको मंसिर २९ गतेको पत्रअनुसार कालिकामाई गाउँपालिकामा कार्यरत प्रमुख प्रशासकीय अधिकृत गिरीलाई जिराभवानी गाउँपालिकामा सरुवा गरिएको थियो ।
सोही निर्णयअनुसार जिराभवानी गाउँपालिकाका तत्कालीन प्रमुख प्रशासकीय अधिकृत राज कुशवाहालाई कालिकामाई गाउँपालिकामा सरुवा गरिएको थियो । तर सरुवा निर्णय सार्वजनिक भएसँगै जिराभवानी गाउँपालिकामा विवाद उत्पन्न भएको थियो । गाउँपालिकाका अध्यक्ष अनोज चौधरीले प्रमुख प्रशासकीय अधिकृत गिरीलाई कुनैपनि शर्तमा हाजिर हुन नदिने उल्लेख गर्दै सामाजिक सञ्जाल फेसबुकमार्फत प्रेस विज्ञप्ति सार्वजनिक गरेका थिए ।
अध्यक्ष चौधरीको उक्त अभिव्यक्तिपछि गाउँपालिकाभित्र असहज परिस्थिति सिर्जना भएको बताइएको छ । अधिकृत गिरी शुक्रबार कार्यालयमा हाजिर हुन आउने सूचना पाएपछि गाउँपालिकाको कार्यालयका सम्पूर्ण कक्षहरूको साँचो अध्यक्ष चौधरीले आफ्नो नियन्त्रणमा लिएको एकजना कार्यपालिका सदस्यले जानकारी दिएका छन् । यस घटनाले गाउँपालिकाको प्रशासनिक गतिविधिमा थप तनाव सिर्जना गरेको देखिएको थियो ।
तर गाउँपालिका उपाध्यक्ष रेखा चौधरीको नेतृत्वमा कार्यालयको “बी” ब्लकमा रहेका कक्षहरूको ताल्चा फोडी कृषि शाखाको कक्षलाई अस्थायी रूपमा प्रमुख प्रशासकीय अधिकृतको कार्यकक्ष बनाइएको थियो । त्यसपछि प्रमुख प्रशासकीय अधिकृत अमित कुमार गिरीलाई फूलमाला र खादा ओढाई औपचारिक रूपमा स्वागत गरिएको थियो ।
स्वागत तथा कार्यभार ग्रहण कार्यक्रममा जिराभवानी गाउँपालिकाका विभिन्न वडाध्यक्षहरू महादेव प्रसाद महतो, सुरज राय थारु, राजेश्वर दास थारु, दारा सिंह राउत थारु, कार्यपालिका सदस्यहरू, वडा सदस्यहरू, लेखा शाखा तथा प्राविधिक शाखाका कर्मचारीहरू साथै विभिन्न वडामा कार्यरत कर्मचारीहरूको उल्लेखनीय सहभागिता रहेको थियो ।
घटनाक्रमले जिराभवानी गाउँपालिकामा प्रशासनिक नेतृत्वलाई लिएर देखिएको असमझदारीलाई सतहमा ल्याएको छ । यद्यपि, प्रमुख प्रशासकीय अधिकृत गिरीले औपचारिक रूपमा कार्यभार सम्हालेसँगै गाउँपालिकाको नियमित प्रशासनिक कामकाज अघि बढ्ने अपेक्षा गरिएको छ । 
प्रतिक्रिया दिनुहोस् !