वीरगंज (पर्सा), ५ पुस । राष्ट्रिय स्वतन्त्र पार्टी (रास्वपा) ले वीरगंज महानगरपालिकामा संगठन विस्तारको अभियानलाई तीव्र बनाएको छ । सोही अभियानअन्तर्गत रास्वपाले वीरगंज महानगरपालिका वडा नम्बर ३ मा औपचारिक रूपमा वडा समिति गठन गरेको छ । नवगठित वडा समितिको सभापतिमा किरण कटुवाल चयन भएका छन् ।
यस्तै, उपसभापतिमा लालबाबु मन्सुरी, सचिवमा अनिल कुमार दास तथा सहसचिवमा एकबाल मिया र राकेश महर्जन चयन भएका छन् । समितिका सदस्यहरूमा सुरेश पासी, अशरफ मन्सुरी, नुरेनबी मन्सुरी, छोटु साह सोनार, राजु कुमार स्वामी, समीर मिया धोबी, राजन कुमार दास, अजय कुमार दास र जावेद मिया मन्सुरी रहेका छन् । त्यसैगरी, वडा समितिको सल्लाहकारमा मञ्जुरल हक अन्सारी, सम्सुदिन अन्सारी र ज्याउल हक मन्सुरी चयन भएका छन् ।
वडा समिति गठन कार्यक्रममा बोल्दै राष्ट्रिय स्वतन्त्र पार्टी पर्साका सभापति हरी पन्तले निकट भविष्यमा वीरगंज महानगरपालिकाका ३२ वटै वडामा पार्टीको वडा समिति गठन गरिने जानकारी दिए । उनले हाल वीरगंज महानगरका सबै वडाबाट राष्ट्रिय स्वतन्त्र पार्टीमा आवद्ध हुन चाहने नागरिकहरूको उल्लेखनीय लहर देखिएको दाबी गरे ।
महानगर सभापति महमदुद्दिन आलमको सभापतित्वमा सम्पन्न उक्त कार्यक्रमको सहजीकरण पार्टी सचिव गौतम श्रेष्ठले गरेका थिए । कार्यक्रममा महानगर उपसभापति परितोष द्विवेदी, सहसचिव मुन्ना साह तथा पार्टी नेता परवेज आलमको विशेष उपस्थिति रहेको थियो ।
रास्वपाले संगठन सुदृढीकरणमार्फत स्थानीय तहमा आफ्नो राजनीतिक पकड बलियो बनाउने रणनीतिअनुसार वडा तहसम्म सक्रियता बढाउँदै लगेको जनाएको छ । 
प्रतिक्रिया दिनुहोस् !