मलंगवा (सर्लाही), २५ मंसिर । सर्लाहीको मलंगवास्थित गरिमा विकास बैंकबाट ठगीमा परेको भन्दै एक व्यक्तिले बुधबार प्रहरीकै अगाडि आत्मदाह गर्ने प्रयास गरेपछि घटनाले स्थानीय क्षेत्रमा सनसनी फैलिएको छ । चन्द्रनगर गाउँपालिका–६ कामद निवासी नथुनी मुखिया बिनले आफ्नै शरीरमा पेट्रोल छर्किएर आगो लगाउने प्रयास गरेपछि प्रहरीले तत्काल उद्दार गरेको हो ।
पीडित नथुनीका अनुसार बैंकले ‘५ करोड ऋण दिन्छु’ भन्दै उनको नाममा रहेको करिब डेढ करोड मूल्य बराबरको जग्गा लिलाम–सकार गराएको थियो । तर विगत साढे दुई वर्षदेखि न त ऋण उपलब्ध गरायो, न त लिलाम सकार गरिएको जग्गा नै भोग चलाउन दिए । राष्ट्र बैंकमा समेत उजुरी गर्दा कुनै सुनुवाइ नभएको, व्यवसाय चौपट भई जीवनयापन कठिन बन्दै गएको र यही समस्याले आत्मदाहको निर्णय लिनुपरेको उनले प्रहरीसमक्ष बताएका छन् ।
नथुनी मात्र होइन, गरिमा विकास बैंक (पहिले सहारा विकास बैंक) बाट ठगीमा परेको भन्दै न्याय खोजिरहेका अन्य पीडित पनि निकै अघि बढेर संघर्षरत छन् । फेकन रायका अनुसार विगत चार वर्षदेखि आफूहरू जिल्ला प्रशासनदेखि राष्ट्र बैंकसम्म उजुरी लिएर हिँड्दा पनि न्याय पाउन सकेका छैनन् । उल्टै बैंकका पूर्व प्रबन्धक तथा कर्मचारीहरूले ऋण रकम हिनामिना गरेर बैंकलाई नै बचाउने प्रयास भइरहेको पीडितहरुको आरोप छ ।
रायका अनुसार ३० लाख रुपैयाँ ऋण स्वीकृत भएको कागज देखाइए पनि आफूले १ लाख ५० हजार मात्रै पाएका थिए भने बाँकी रकम बैंकका पूर्व प्रबन्धकले आफ्नो स्वार्थमा दुरुपयोग गरेको दाबी छ । यस्तै, ऋण बुझाइसके पनि जग्गा फुकुवामा ढिलाइ गरिँदै आएको अर्को पीडितले बताए । उनका अनुसार पूर्व म्यानेजर रामएकवाल साहले पटक पटक बुझाइएको रकम बैंकको स्टेटमेन्टमा नचढाई ठगी गरेका थिए ।
करिब दुई दर्जनभन्दा बढी पीडित, जसमा नथुनी मुखिया, राकेश कुमार कापड, कुन्ता राउत, सिताविश्वकर्मा, राकेश भुजेल, फेकन राय यादवलगायतले बैंकले संगठित रूपमा ठगी गरेको आरोप लगाएका छन् । उनीहरूले न्याय नपाए एकैसाथ सामूहिक आत्मदाहसम्मको कदम चाल्न बाध्य हुने चेतावनी दिएका छन् ।
घटनाबारे बुझ्न खोज्दा जिल्ला प्रहरी कार्यालय सर्लाहीका प्रहरी उपरीक्षक योगेन्द्र खड्कासँग सम्पर्क गर्न खोजिएको भएपनि उनले फोन रिसिभ नगरेको बताइएको छ । घटना भएको बेला बैंक खुला समय सकिएकोले कार्यालय बन्द थियो र कुनै अधिकारीसँग सम्पर्क हुन सकेन ।
स्थानीय जनप्रतिनिधिमा समेत दबाब परेको यस घटनाको संवेदनशीलताका कारण बिहीबार दुवै पक्षलाई जनप्रतिनिधि तथा स्थानीयको रोहबरमा बसेर छलफलमा ल्याइने तयारी गरिएको प्रहरी श्रोतले जनाएको छ । सर्लाहीमा ठगी, आर्थिक शोषण र आत्मदाह प्रयासको चर्चाले अहिले स्थानीयवासीसहित सुरक्षा निकायलाई समेत गम्भीर चासोमा पारेको छ । 
प्रतिक्रिया दिनुहोस् !