वीरगंज (पर्सा), १२ जेठ । मानव तस्करी रोधी इकाई क्षेत्र मुख्यालय रक्सौलका प्रहरीले एकजना नेपाली नाबालिक किशोरीलाई उद्दार गरेको छ । मुख्यालयका प्रहरी निरीक्षक मनोज कुमार शर्माको नेतृत्वमा खटिएको प्रहरी टिमले भारतीय सिमावर्ती सहर रक्सौलबाट अन्दाजी १५ वर्षीय नेपाली नाबालिक किशोरीलाई उद्दार गरेको हो ।
मोहम्मद अलि नामक व्यक्तिले जागिर एवं विवाहको प्रलोभन देखाई भारतको उत्तर प्रदेश लैजान लागेको अवस्थामा प्रहरी निरीक्षक शर्माको टोलीले सोधपुछ गर्दा किशोरीलाई बेचबिखनको लागि लैजान लागेको पाएपछि उद्दार गरेको थियो । एकजना केटाले केटीलाई आफूसँगै नेपालबाट भारत तर्फ लैजान लागेको पाएपछि शंका लागेर सोधपुछ गर्दा नाबालिकालाई बेचबिखनको लागि लैजान लागिएको पाइएको मानव तस्करी रोधी इकाई क्षेत्र मुख्यालय रक्सौलका प्रहरी निरीक्षक मनोज कुमार शर्माले जानकारी दिए ।
उनका अनुसार शंकास्पद किशोरीसँग सोधपुछ गर्नको लागि एनजिओ प्रयास जुबेनाइल एड सेन्टर रक्सौलकी आरती कुमारीको सहयोगमा बालिकाको उद्दार गरिएको थियो । सोधपुछकै क्रममा उत्तर प्रदेशका ति युवकले अनलाइन लुडो गेम मार्फत सम्पर्क भई ह्वाट्सएपमा कुराकानी गर्दागर्दै तीन महिनामै आफूसँग भारतको उत्तर प्रदेश जान किशोरीलाई फकाएको पाइएको प्रहरी निरीक्षक शर्माको भनाई छ । ह्वाट्सएपमा कुराकानीको क्रममा युवकले नाबालिक किशोरीलाई आफ्नो नाम पहिला राहुल बताई कुराकानी गर्दै पछि मोहम्मद अलि बताएका थिए । त्यस पश्चात भारतको जयपुरमा जागिर लगाई दिने तथा विवाह गर्ने प्रलोभन देखाई भारत लैजान फकाएका थिए । किशोरीलाई भारत लैजान नेपाल भारत सिमावर्ती सहर रक्सौलसम्म आउन भनेका थिए ।
रक्सौल आएकी ति किशोरीलाई लिएर टेम्पोमा चढी जान लागेको अवस्थामा शंका लागेर प्रहरीले रोकी सोधपुछ गर्दा पहिलो पटक भेट भएको र मोबाइल मार्फत कुराकानी हुँदै आएको बताएपछि शंका लागेर प्रहरीले किशोरीलाई उद्दार गरि युवकलाई पक्राउ गरेको थियो । किशोरीलाई फकाउनका लागि युवकले आफ्नो भाउजुसँग पनि कुराकानी गराएका थिए । कुराकानीकै क्रममा युवकका भाउजुले केटा राम्रो रहेको र तिमीसँग विवाह गरेर खुशीयाली जीवन विताउने एवं जागिरको प्रलोभन दिएपछि किशोरी युवकको जालमा फसेकी थिइन् ।
प्रहरीले युवकसँग सोधपुछ गर्दा अहिले तत्कालको लागि सत्याग्रह एक्सप्रेस ट्रेनबाट गोरखपुर लैजाने योजना रहेको बताएका थिए । गोरखपुरमा केही दिन बसेर त्यस पश्चात कहाँ जाने त्यही निणर्य गरिने योजना थियो । आफूले उत्तर प्रदेशमा लगि जागिर लगाउने प्रलोभन देखाएको तर विवाह गर्न नभनेको सोधपुछको क्रममा युवकले स्वीकारेको प्रहरी निरीक्षक शर्माको भनाई छ । त्यस पश्चात किशोरीको अभिभावकसँग प्रहरीले कुरा गर्दा आफ्नो छोरी भारत गईरहेको भन्ने थाहा समेत नरहेको प्रनि शर्माले जानकारी दिए ।
अभभावकसँग कुरा रक्सौल बोलाई किशोरीलाई अभिभावकको जिम्मा लगाइएको र युवकलाई पक्राउ गरि आवश्वक कारवाही प्रक्रिया अगाडि बढाइएको प्रनि शर्माले जानकारी दिए ।
प्रतिक्रिया दिनुहोस् !