वीरगंज (पर्सा), १९ जेठ । चालु आर्थिक वर्षको पहिलो १० महिनामा वीरगंज नाकामार्फत दलहन आयतमा कमि आएको छ । यस अवधिमा करिब ७ अर्ब ९७ करोड रुपैयाँ बराबरको दलहन नेपाल भित्रिएको छ । विभिन्न सात प्रकारका गेडागुडी आयात भए पनि समग्र आयात अघिल्लो वर्षको तुलनामा उल्लेख्य रूपमा घटेको देखिएको छ ।
वीरगंज भन्सार कार्यालयका अनुसार गत आर्थिक वर्षको सोही अवधिमा १० अर्ब २१ करोड रुपैयाँ बराबरको दलहन आयात भएको थियो । यस वर्ष भने करिब २ अर्ब २४ करोड रुपैयाँ अर्थात २२ प्रतिशतले गिरावट आएको हो । सूचना अधिकारी उदयसिंह विष्टका अनुसार सबैभन्दा बढी आयात हुने मुसुरो दालमा नै ठूलो कमी आएको छ ।
चालु वर्षमा ३ अर्ब २० करोड रुपैयाँ बराबरको मुसुरो आयात भएको छ, जुन गत वर्षको ४ अर्ब ५० करोडको आयात भएको थियो । यसैगरी चालु आवमा २ अर्ब ४ करोड रुपैयाँ बराबरको सिमी/राजमा आयात हुँदा गत वर्ष सोही अवधिमा २ अर्ब ७४ करोड रुपैयाँको आयात भएको थियो । चनाको आयात पनि घटेर १ अर्ब ९२ करोडमा सीमित भएको छ, जबकि गत वर्ष २ अर्ब १७ करोड रुपैयाँ बराबरको चना भित्रिएको थियो । 
प्रतिक्रिया दिनुहोस् !