वीरगंज (पर्सा), १० जेठ । नेपाल पत्रकार महासंघ पर्साको आयोजनामा पत्रकार आचारसंहितासम्बन्धी एकदिने अनुशिक्षण कार्यक्रम सम्पन्न भएको छ । महासंघको सभाहलमा आयोजित कार्यक्रममा जिल्लाका विभिन्न सञ्चारमाध्यममा कार्यरत नयाँ पत्रकारहरूको उल्लेखनीय सहभागिता रहेको थियो । कार्यक्रमले पत्रकारितामा पेशागत मर्यादा, जिम्मेवारी र आचारसंहिताको महत्वबारे गम्भीर छलफल गराएको थियो ।
नेपाल पत्रकार महासंघ पर्सा शाखाका अध्यक्ष ओमप्रकाश खनालको अध्यक्षतामा सम्पन्न कार्यक्रमको उद्घाटन महासंघका केन्द्रीय सचिव अशोक तिवारी ले गरेका थिए । उद्घाटन सत्रलाई सम्बोधन गर्दै उनले पत्रकारितामा सत्य, निष्पक्षता र उत्तरदायित्वलाई आत्मसात् गर्नुपर्ने आवश्यकता औंल्याए । पत्रकारले आफ्नो व्यवहार र पेशागत आचरणप्रति सजग रहन नसके आलोचनाको सामना गर्नुपर्ने उल्लेख गर्दै उनले मर्यादित र विश्वसनीय पत्रकारितालाई प्राथमिकतामा राख्न आग्रह गरे ।
सचिव तिवारीले वर्तमान परिस्थितिमा सञ्चार क्षेत्र विभिन्न चुनौतीबाट गुज्रिरहेको उल्लेख गर्दै सरकारले लागू गरेको आर्थिक नाकाबन्दीविरुद्ध नेपाल पत्रकार महासंघ आन्दोलनमा रहेको बताए । उनले महासंघद्वारा सञ्चालन भइरहेका आन्दोलनका कार्यक्रम सफल बनाउन सबै पत्रकारलाई सक्रिय सहभागिताका लागि आह्वान समेत गरे ।
कार्यक्रममा श्याम बञ्जारा, दिपेन्द्र चौहान तथा शम्भु कुमार सुमन लगायतले पत्रकारितामा बढ्दो चुनौती, सञ्चारमाध्यमको विश्वसनीयता र पेशागत अनुशासनका विषयमा धारणा राखेका थिए । कार्यक्रमको सञ्चालन महासंघ पर्साका सचिव विजय चौहानले गरेका थिए ।
अनुशिक्षण कार्यक्रममा नेपाल पत्रकार महासंघका केन्द्रीय लेखा समिति संयोजक केसी लामिछाने ले प्रशिक्षण दिएका थिए । उनले पत्रकार आचारसंहिताको व्यवहारिक प्रयोग, समाचार सम्पादनका क्रममा अपनाउनुपर्ने सावधानी तथा आधुनिक पत्रकारितामा देखिएका चुनौतीबारे विस्तृत सहजीकरण गरेका थिए ।
प्रशिक्षणका क्रममा पत्रकारितामा सत्यतथ्यमा आधारित सूचना सम्प्रेषण, निष्पक्ष समाचार लेखन र सामाजिक उत्तरदायित्वलाई केन्द्रमा राख्नुपर्नेमा विशेष जोड दिइएको थियो । साथै जिम्मेवार समाचार सम्प्रेषण, सञ्चारमाध्यमप्रतिको जनविश्वास कायम राख्ने दायित्व तथा पत्रकारको पेशागत मर्यादासम्बन्धी विषयमा समेत सहभागी पत्रकारहरूलाई प्रशिक्षण प्रदान गरिएको थियो ।
कार्यक्रमले नयाँ पुस्ताका पत्रकारहरूलाई पेशागत मूल्य, नैतिकता र उत्तरदायी पत्रकारिताप्रति थप सचेत बनाउने विश्वास आयोजकले व्यक्त गरेका छन् । 
प्रतिक्रिया दिनुहोस् !