वीरगंज (पर्सा), ५ जेठ । नेपाल पत्रकार महासंघ पर्सामा सदस्यता शुद्धीकरण तथा नयाँ सदस्यता वितरणको विषय फेरि पेचिलो बनेको छ । यसै विषयलाई लिएर गठित संघर्ष समितिले मंगलबार महासंघ नेतृत्वसमक्ष ज्ञापनपत्र बुझाउँदै तत्काल प्रक्रिया अघि नबढाइए चरणबद्ध आन्दोलनमा उत्रिने चेतावनी दिएको छ । संघर्ष समितिका संयोजक अनुप तिवारी नेतृत्वको टोलीले महासंघ पर्साका अध्यक्ष ओमप्रकाश खनाललाई ज्ञापनपत्र बुझाउँदै विगतमा सञ्चालन गरिएको सदस्यता छानबिन प्रक्रियालाई निरन्तरता दिन माग गरेको हो । समितिले विधानविपरीत तथा अयोग्य व्यक्तिले लिएको सदस्यता खारेज गरी वास्तविक र सक्रिय पत्रकारलाई अविलम्ब सदस्यता उपलब्ध गराउनुपर्नेमा जोड दिएको छ ।
ज्ञापनपत्रमा नेपाल पत्रकार महासंघ लोकतान्त्रिक व्यवस्था, प्रेस स्वतन्त्रता र नागरिक भरोसासँग जोडिएको संस्था भएकाले यसको गरिमा जोगाउन विधान, विधि र स्थापित पद्धतिअनुसार निर्णय प्रक्रिया अगाडि बढ्नुपर्ने उल्लेख गरिएको छ । समितिले विगतमा भएका शुद्धीकरण अभियानलाई उदाहरणका रूपमा प्रस्तुत गर्दै अहिले पनि त्यही अभ्यासलाई निरन्तरता दिनुपर्ने धारणा राखेको छ । समितिले २०७२ माघ १४ गते महासंघ पर्साका पूर्वअध्यक्ष सत्रुधन नेपालको संयोजकत्वमा गठन गरिएको कार्यदलले तय गरेका सात बुँदे मापदण्डको स्मरण गराएको छ । उक्त मापदण्डका आधारमा अघिल्ला कार्यकालहरूमा सदस्यता छानबिन गरिएको र मापदण्ड पूरा नगर्ने व्यक्तिहरूलाई सदस्यताबाट अलग गरिएको उल्लेख गर्दै अहिले पनि त्यही मापदण्डअनुसार प्रक्रिया अघि बढाउनुपर्ने माग गरिएको छ ।
संघर्ष समितिले योग्य, सक्रिय तथा पेशागत रूपमा संलग्न पत्रकारहरू अझै सदस्यताबाट वञ्चित रहेको दाबी गर्दै उनीहरूलाई शीघ्र सदस्यता प्रदान गर्न आग्रह गरेको छ । समितिका अनुसार महासंघभित्र देखिएको सदस्यता विवाद समाधानका लागि पारदर्शी र निष्पक्ष छानबिन आवश्यक छ । समितिले तीन दिनभित्र सदस्यता शुद्धीकरण र नयाँ सदस्यता वितरणका लागि आवश्यक पहल नगरे आन्दोलनका कार्यक्रम सार्वजनिक गर्ने चेतावनी पनि दिएको छ । आन्दोलनका स्वरूपबारे स्पष्ट नखुलाइए पनि समितिले दबाबमूलक कार्यक्रममार्फत आफ्नो अभियानलाई अगाडि बढाउने संकेत गरेको छ ।
वीरगंजस्थित महासंघको कार्यालयमा पुगेर बुझाइएको ज्ञापनपत्र कार्यक्रममा संघर्ष समितिका सहसंयोजक शेखर छतकुल्लीसहित सदस्यहरू आशिक अन्सारी, लालकिशोर सिंह, राम कुशवाहा, राजेन्द्र सिंह, सन्तोष पटेल र बलिराम यादवलगायत पत्रकारहरूको उपस्थिति रहेको थियो । त्यसैगरी ज्ञापनपत्र बुझ्ने क्रममा महासंघ पर्साका उपाध्यक्ष भुषण यादव, कोषाध्यक्ष संजीव कुमार मिश्र तथा सहसचिव एस.के. चौरसिया पनि उपस्थित रहेका थिए । सदस्यता विवादलाई लिएर महासंघभित्र बढ्दो दबाबसँगै अब नेतृत्वले कस्तो निर्णय लिन्छ भन्ने चासो पत्रकार वृत्तमा बढेको छ ।
प्रतिक्रिया दिनुहोस् !